«La llegada d’aguamales puede afectar al turismu», alverten dende l’Oceanográficu de Xixón. Los biólogos Rafael González-Quirós y Xosé Anxelu Gª. Morán aseguren que «el caltenimientu de los océanos ye’l principal desafíu de la Humanidá para les próximes décades».
- Fonte: LNE / Meduses: info tipos /
A finales del pasáu mes de xunetu, una folada de carabeles portugueses, un organismu marín paecencia a l’aguamala que la so picadura ye bien doliosa y puede aportar a mortal en persones vulnerables, fixo saltar les alarmes en delles sableres del Oriente asturianu.
Pocos díes dempués asocedía lo mesmo na mariña occidental. Nun ye’l primer branu en qu’asocede. Amás del so efectu na salú de los bañistes, el fenómenu puede tener más consecuencies. «Si la presencia d’estes aguamales va a más, puede tener un impactu nel turismu d’Asturies», alvirtió ayeri Rafael González-Quirós, director del Centru Oceanográficu de Xixón, mientres la so participación, xuntu al investigador Xosé Anxelu G. Morán, na cuarta xornada de la II Selmana de la Innovación, celebrada nel Club LA NUEVA ESPAÑA.
González-Quirós fixo esta alvertencia dientro d’una esposición sobro la importancia de los océanos nel equilibriu medioambiental del planeta y del efectu de la contaminación humana nel mediu marín. El científicu aseguró que «los océanos absorbieron más del 80% del escesu de calor que los seres humanos xeneremos cola contaminación», razón pola que «el caltenimientu de los océanos ye’l gran retu de la Humanidá pa les próximes décades».
