L’osu afamiáu qu’apavora a un pueblu asturianu: «Duerme equí». L’animal mató un corderu na localidá de Proaza, arrincó dellos frutales y pasó «toa una nueche comiendo piescos».
Vista de Serandi, en Proaza.
Les andances d’un osu afamiáu caltienen en fierros a los 19 habitantes del pequenu núcleu de Serandi, en Proaza, dende fai barganal d’un mes. L’animal empezó averándose a la localidá, una aldega en cuesta al llau del monte, y tantu tuvo de gusta-y l’asentamientu qu’acabó quedándose a vivir.
Ye lo qu’aseguren los vecinos, munchos d’ellos d’edá avanzada, que se confiesen «bien asustaos» pola presencia del plantígradu al llau mesmu de les sos cases, onde foi columbráu en más d’una ocasión y onde dexó seña del so pasu en forma de grandes montones d’escrementos.
