El xuráu reconoció l’actividá innovadora» de la fundadora n’Ayande de la empresa Ayande Stars.
- Fonte: Nortes.me / Noticia READER / Semeyes: Andreu Vicente
La promotora d’Ayande Stars, l’astrofísica Lucía González Cuesta, foi escoyida esti vienres Muyer Rural d’Asturies 2024 na séptima edición del galardón convocáu pola Rede Asturiana de Desenvolvimientu Rural (READER), a la qu’aspiraben 41 candidatures. El xuráu valoró la trayectoria de Lucía González, pola actividá innovadora que realiza, consistente na divulgación científica de l’astronomía nel mediu rural y la consiguiente xeneración de recursos de turismu científicu y astroturismo.
L’actu d’entrega del galardón Muyer Rural d’Asturies 2024 va celebrase’l próximu 15 d’ochobre, con motivu del Día Internacional de les Muyeres Rurales, na Antigua Fábrica Ortíz, en Candás.
Lucía García (Cereceda, Ayande), de 38 años, ye llicenciada en Física por La Universidá d’Uviéu, máster n’Astrofísica pola Universidá de la Llaguna y doctora n’Astrofísica pol Institutu d’Astrofísica de Canaries.
Les actividaes d’Ayande Stars ufierten afayar constelaciones y planetes na observación empuesta de cielu nocherniegu, construyir y llanzar cohetes en familia o en grupos d’amigos, o ver nun xacimientu con casi 3.000 años d’hestoria cómo’l patrimoniu de la zona rural ta conectáu col cielu, o l’orixe cósmicu del patrimoniu asturianu.
Amás, aprender a midir la contaminación llumínica, afayar el cielu nocherniegu empuestu por astrofísiques, utilizando telescopios y prismáticos, o dexase emponer poles estrelles son dalgunes de les munches actividaes que dirixe Lucía por tol territoriu rural asturianu.
Lucía González foi ganadora del Concursu Nacional de Divulgación Científica Somos Científicos y Científiques.
El xuráu d’esta séptima edición tuvo integráu, ente otros componentes, pola delegada del Gobiernu n’Asturies, Adriana Lastra, y la directora xeneral d’Igualdá del Gobiernu del Principáu, María Jesús Álvarez, y el presidente de la Rede Asturiana de Desenvolvimientu Rural (READER), Belarmino Fernández Fervienza.
La premiada va recibir tamién xuna escultura diseñada pol artista asturianu Kiko Urrusti.
