«SIGUIR TIRANDO»
Nun ye cierto,
nun lo creyas,
nun ye cierto n´absoluto
eso que tanto nos repitieron
de qu´ha de facete más fuerte
lo que nun t´afuega.
Lo que nun ye quien afogate
una vez que lo intentó
quédate atorao nel gargüelu
y nel alma,
ruémpete en mil
pa enxamás dexate volver a ser
quien yeres
y a partir d´esi momentu,
son los cachos pequeñinos de ti
los que s´encarguen,
trabayosamente,
de siguir llevando a los tos pulmones
un mínimu d´oxíxenu
pa siguir tirando.
Pero yá nun yes el to yo de siempre,
nun t´engañes,
por poco sensible que seyas
tas esfechu,
marcáu
anque pegues los pedazos.
Yes un cadabre
que sigue respirando.
Elvira Laruelo
