- Alborecemos col cielu empuercáu de nubes medies y altes, tando la nubosidá más compacta al sur de la cordelera y fastera surocidental d’Asturies con unes temperatures que tan alrodiu de los 8ºC, rexistrándose nel puirtu Payares 6,7ºC.
- Güei vamos tener el cielu con nubosidá media-alta pero sin más consecuencies, amás les temperatures másimes ascenderán y l’aire sedrá sele ya variable, sicasí na cordelera pue soplar vientu ábrigu con dalguna racha moderada en zones altes.
- Mañana domingu, por mor de brises de componente norte, va entranos dalgo d’humedá formando nubes baxes na metá norte d’Asturies amás de nublines y borrinos no fonderu los valles, mentantu n’altor seguiremos con nubosidá media-alta con unes temperatures másimes que baxen dalgo, a les contra de les mínimes que tienden a medrar pol aumentu de la nubosidá baxa.
- El llunes sedrá un día mui asemeyáu con nubosidá baxa na metá norte y fastera central asturiana y nubes medies y altes al sur con unes temperatures que van camudar poco, calteniéndose un ambiente suave en xeneral.
- El martes pela tarde mos lleguen vientos de componente noroeste pero paez que mui descafeináos, ente les altes presiones sin malpenes aire fríu que mos dexarán precipitaciones febles y dalguna nevada a últimes hores nes cumes más altes de la cordelera perriba de los 2000m.
- El miércoles l’aire de componente noroeste pue soplar con fuercia en zones altes ya en puntos del llitoral apurriéndonos xarabatos intermitentes, dalguna nevada feble nes cumes perriba de los 2000m y un descensu de les temperatures.
- Pa más alantre sigue sin vese na destacable más qu’una circulación atmosférica zonal que mos empobinará borrasques atlántiques con sus frentes asociaos, predominiu de vientu ábrigu y dalguna rolada a componente noroeste que pue dexanos dalguna galerna per Cantábricu.
