- Alborecemos con nubosidá media-alta y con unes temperatures que tan alrodiu de los 12ºC, dalgo menos nes zones d’iversión térmica, rexistrándose nel puirtu Payares 6,7ºC.
- Güei vamos tener nubes medies y altes que sedrán más abondoses na metá ocidental d’Asturies y cara sur de la cordelera, onde nun se descarta dalguna gotera ocasional ya dispersa con unes temperatures altes, condicionaes pol vientu ábrigu que va soplar con raches moderaes en zones altes y espuestes.
- El prósimu riscar arreciará l’aire de componente sur, faciendo l’efeutu foehn al pasu pela cordelera, dexándonos una nueche cálida con mínimes alrodiu de los 15ºC nel meyor de los casos. Nel cielu tendremos nubosidá media-alta y durante’l día l’aire ábrigu perdirá puxu y tenderá a rolar a gallegu con unes temperatures másimes en llixeru descensu. Nun s’eperen precipitaciones hasta l’atapecer cola llegada d’un frente atlánticu anque’l gruesu d’elles vendrá col camudu’l día.
- Paez que’l llunes tornamos a la normalidá ya tendremos el cielu mui nuboso con precipitaciones febles en xeneral que sedrán de nieve perriba de los 1800m, dalgo más baxa pela tarde pero yá sin malpenes xarabatos. Les temperatures en descensu moderáu y l’aire gallegu-altu sele na mayor parte d’Asturies.
- El martes pela tarde-nueche un nuevu frente atlánticu mos afeutará, tando la mañana más seliquina y paez que va habiendo unanimidá de los modelos meteorolóxicos en metenos una entrada fría pal final de la ponte de La Constitución, mentantu, a parte del frente del martes, el tiempu sedrá secu y seliquino.
- Agora mesmo lo que se ve ye una entrada fría dalgo descafeinada, solamente mos entrará aire fríu en capes medies de l’atmósfera por mor de les altes presiones que se situen mui cerquina de nos, impidiendo que mos entre aire fríu n’altor, asína y too la llegada de vientu de componente norte mos apurrirá precipitaciones moderaes que puen ser persistentes llocalmente, asína como nevaes pela cordelera perriba de los 1000m, sobre too na fastera oriental. Lo bono ye que la situación pue derivar n’altes presiones sobre la península que mos dexarien per un lláu la puerta pesllada a la puxarra atlántica y per otru’l cielu escampláu y xelaes nuecherniegues, pero bono esto ye lo que se ve agora, porque tamién puen echase les altes presiones de mano enrriba nuesu y quedar too n’un poco d’orpín. Diremos viendo ya informado.
