- Alborecemos ente borrinos y nublines con nubes más desendolcaes nel ocidente Astur con unes temperatures que tan alrodiu de los 12ºC, rexistrándose nel puirtu Payares 5,5ºC.
- Güei van dir dixebrándose les nublines y borrinos del alborecer pa dexanos el cielu con nubes ya claros o abancios a partir del mediudía, tando más nuboso cuantu más al oeste nos atopemos. Al atapecer volverá la nubosidá a toa Asturies col riesgu de dalguna gotera, sobre too na fastera ocidental. Les temperatures másimes en descensu y l’aire sele ya variable.
- Mañana domingu la posición de les altes presiones va empobinanos un chorru d’humedá dende l’Atlánticu que mos dexará precipitaciones al alborecer y pela mañana con tendencia a remitir y desaparecer pela tarde. Les temperatures camudarán poco y l’aire gallegu pue soplar con dalguna racha moderada nes zones propicies.
- El llunes nel cielu tendremos nubes ya claros dempués d’alborecer ente nublines y borrinos que dirán dixebrándose a lu llargu la mañana. L’aire entama a soplar del nordés y les temperatures anicien un descensu que sedrá prolongáu los siguientes díes.
- Martes, una masa d’aire fríu continental arrastrada pol vientu nordés, va dir ganando terrén sobre la península Ibérica faciendo que baxen les temperatures abondo anque les precipitaciones nun llegarán hasta finar el día, mentantu nel cielu tendremos nubes ya claros o abancios y a partir del mediudía l’aire nordés pue ser cafinte nel llitoral y zones altes, baxando la sensación térmica entovía más.
- Pues paez, si nun se tuerce la cosa, durante’l riscar del miércoles podemos tener la primera nevada relevante de la temporada sobre la cordelera y ye qu’apesar de ser una masa d’orixen continental seca, l’aire nordés va cargar dalgo d’humedá al so pasu pel Cantábricu, dexándonos precipitaciones y xarabatos xeneralizaos, ente febles ya moderaos que puen ser en forma de nieve perriba de los 1300m con tendencia a remitir n’intensidá ya frecuencia a lu llargu del día con unes temperatures en bultable descensu ya col aire nordés que va soplar cafiante nel llitoral y zones altes.
- Los siguientes díes seguirá fríu y revueltu pero esto yá lu diremos viendo.
Semeya que mos l’apurre la nuesa collacia Consuelo Vázquez.
