- Alborecemos con dalgo de nubosidá ya con unes temperatures que tan alrodiu de los 7ºC nel interior y perencima de los 10ºC na costa por mor del vientu nordés que ta soplando cafiante, rexistrándose nel puritu Payares 5,4ºC.
- Güei vamos tener dalgo de nubosidá en forma d’estratos na metá norte d’Asturies mentantu que per el sur aumentará la nubosidá alta qu’empuercará’l cielu con unes temperatures másimes en nidiu ascensu, amás l’aire perderá fuelle pa quedar sele ya variable.
- Mañana vienres tendremos intervalos de nubosidá media-alta entemecía ente dellos claros per un lláu y per otru surdirán borrinos y nublines no fonderu los valles durante’l riscar con unes temperatures que siguen n’ascensu col aire sele ya variable.
- Sábadu y domingu la situación sedrá mui asemeyada con nublines y borrinos nes hores nocturnes que tenderán a dixebrase durante’l día ya con nubes medies y altes qu’entrarán per sur d’Asturies. Les temperatures sedrán suaves en xeneral y l’aire sele ya variable.
