- L’Anguleru vuelve al Acuariu de Xixón. Los neños van falar con él, vía satélite, antes d’empecipiar el so viaxe en barcu.
L’Anguleru, el simpáticu personaxe asturianu que trai los regalos en Nuechebona, va ser el protagonista de les Navidaes nel Bioparc Acuariu de Xixón. Va Ser esti domingu 1 d’avientu, cuando faiga’l so tradicional salida, marcando l’entamu oficial de la Navidá más asturiana.
A les 12 hores, el públicu presente nel Acuariu va poder conectar en directu, vía satélite, con L’Anguleru, que nesi momentu va tar nel Mar de los Sargazos, preparando’l so viaxe tresoceánicu escontra la nuesa rexón. Esta travesía, que dura aprosimao una selmana, va rematar cola so llegada a Asturies el próximu vienres 6 d’avientu.
Esta conexón va ser una oportunidá única para falar con L’Anguleru, l’entrañable Pá Noel asturianu que, como cada Nuechebona, trai regalos a les neñes y neños de la nuesa tierra.
Amás, l’Acuariu de Xixón va allugar de manera permanente la oficina navidiega’ de L’Anguleru, un espaciu onde se van recibir les cartes y pidimientos de los más pequenos, calteniendo viva la tradición y la maxa d’esta figura tan querida na nuesa cultura.
