Otru sorprendente afayu animal na ría de Villaviciosa: alarma polos xabalíes mariscadores y nadadores. Los vecinos tán esmolecíos pola presencia de grandes exemplares que s’alimenten de mariscu y convirtieron una isla del estuariu nel so fuerte.
Tres la sorprendente apaición d’una llondra (nutria) na ría de Villaviciosa, un mamíferu que diba tiempu que nun se vía na zona, agora llega un grupu de xabalíes y el so sorprendente comportamientu na privilexada redolada de la mariña asturiana.
Los vecinos de San Martin del Mar atópense sollertaos pola recién apaición de media docena de suidos de grandes dimensiones qu’anden pol estuariu y la so contorna. Concretamente, ente la marxe esquierda del calce y la conocida como isla de Monesteriu.
Estos animales selvaxes nun se vieren al pie de la ría dende va tiempu, pero volvieron apaecer va pocos díes, xenerando alarma y esmolición ente los vecinos. Dalgunos, como los hermanos Raúl y Julio Ordieres, que los vieron y fotografiaron a escasos 300 metros de la so casa, tarrecen que los xabalíes puedan desencadenar accidentes de tráficu, al tar xusto al llau de la carretera que bordia la zona.
“Nun fai enforma yá apaeció un exemplar atropelláu nuna cuneta tres un accidente nocherniegu, y yá causaron más d’un choque. Amás, siempres xeneren daños n’esplotaciones agrícoles, y son un riesgu y xuna amenaza pa los nuesos animales, les mascotes y los neños. Entráronnos nel xardín al llau de casa y llevantáronnos hasta les piedres. Son peligrosos, porque al ser adultos y de gran pesu, nun tienen mieu y pueden resultar agresivos«, aseguren estos vecinos, sosprendíos pola vuelta de los xabalíes a un espaciu protexíu como la Reserva Natural Parcial de la Ría de Villaviciosa.
Sorpresa tamién causó a estos vecinos lo bien que se defenden los suidos nesti ambiente, onde se volvieron esquisitos cola so dieta al aficionase al mariscu. «Ta claro qu’equí atopen abondosa comida, como amasueles, navayes, virigüetos/berberechos y hasta peces. Atoparon un abelugu seguru nel castru, onde se sienten protexíos. Sospriende tamién lo bien que naden», aseguren los hermanos Ordieres. El fechu de que l’espaciu protexíu de la ría lleve más de diez años zarráu al marisquéu por contaminación conviertelu nuna fonte d’alimentu pa la fauna, a la qu’agora se sumaron esti grupu de xabalíes.
- Un Ecosistema Diversu. La Ría de Villaviciosa ye un estuariu de gran importancia ecolóxica y unu de los más calteníos del norte d’España. Esti espaciu natural protexíu ye’l llar d’una rica variedá de flora y fauna, incluyendo numberoses especies d’aves migratories, lo que lo convierte nun llugar ideal para la observación d’aves.
- Paisaxes que Cautiven. La área alredor de la ría ufierta paisaxes impresionantes, dende marismes y sableres hasta campos verdes y montes. Ye un llugar perfectu para los fotógrafos de naturaleza y aquellos que busquen un momentu de tranquilidá nuna redolada natural.
Reserva Natural Parcial de la Ría de Villaviciosa (Turismo Asturies ) ye un formosu espaciu natural onde se conxuguen elementos de los ríos y del mar.
