Festival «Escenines» teatrales pa la Reciella

• Queden namás unos díes pal arranque de les nuestres Escenines, y esti añu nun puen paecenos más prestoses.
  Mirái qué histories más guapes van cuntase:
• Xueves 26. El rock familiar de los anti-pop
• Vienres 27. Hánsel y Gretel (Premiu Nel Amaro)
• Sábadu 28 (12.00h). Los cuentos del pelegrín… que va de vuelta
• Llunes 30. Al rodiu l’horru

Xueves 26. El rock familiar de los anti-pop: El Pola y el Gallu son dos pintes de barriu que lleven tola vida enfotaos en trunfar nel mundu del rock and roll. Piensen que temazos como «Toi como una cabra», «El trasgu» o «Los deos de la mano» merecíen tar nes llistes de grandes ésitos infantiles de tolos tiempos, pero de momento nun son a ello. Maxi Compán (vocalista del grupu punk-rock Fe de Ratas) y Carlos Alba «Cellero» formen LOS ANTI-POP, un dúu musical que fai rock pa neñes y neños, y que xusto esta navidá del 25 arreblaga dende’l programa Animalada Xabaz (TPA) hasta l’Antiguu Institutu de Xixón.

Vienres 27. Hánsel y Gretel (Premiu Nel Amaro): Trés primos tienen qu’empaquetalo too nel vieyu someráu de casa sos güelos enantes de que venga ́l camión de les mudances.
Ente los sos vieyos peluches y un montón de trastos rotos, atopen los llibros que-yos lleía’l so güelu cuando yeren pequenos siendo’l so favoritu Hansel y Gretel.
Anque pasaron bien d’años dende entós, los trés recorden perfectamente’l cuentu y relleéndolo van esfrutar como si inda fueren aquellos neños d’antaño.
Higiénico Papel Teatro

Sábadu 28 (12.00h). Los cuentos del pelegrín… que va de vuelta: Un pelegrín por encargu allega a un hospital medieval del Camín de Santiagu y, mientres descansa y se prepara pa siguir el so viaxe, cuenta a los ellí presentes delles aventures y curiosidaes, personales o ayenes, reales o figuraes… pero col estilu célebre d’un viaxeru profesional que, tres allegar milenta vegaes al so destín, yá va de vuelta.
La Buelga

Llunes 30. Al rodiu l’horru: Una nueva ola de quemes pon en peligro munchos sitios d’Asturies.
Nora vuelve al llugar máxicu onde xugaba de neña, l’horru la güela, decidida a salvalu del fueu y de lo que sía.
Al llegar, la so imaxinación dispárase. Les hestories escondíes nos rellavicos d’estes construcciones centenaries empiecen a revivir y les pieces van tresformándose en personaxes inesperaos.