«Dexamos un mes de payares insólitu, con temperatures mui perriba de lo normal, con una desviación positiva de más de 3ºC dende que se tienen rexistros pero preséntase un mes d’Avientu con tintes ivernales»
- Alborecemos con nubosidá media-alta ya con temperatures suaves que tan alrodiu de los 14ºC, dalgo menos en sitios d’iversión, rexistrándose nel puirtu Payares 7,4ºC.
- Güei vamos tener de nuevu nubosidá media-alta entemecida ente dellos claros o abancios anque estos sedrán los menos. Les temperatures van caltenese suaves hasta’l atapecer cuando aumentará la nubosidá de la manu d’un frente atlánticu que mos apurrirá precipitaciones al finar el día, antes pue cayer dalguna gotera dispersa ya ocasional. L’aire ábrigu va soplar con raches moderaes en zones altes de montaña pa dir amenorgando y rolando a gallegu pela tarde.
- El prósimu riscar vamos tener precipitaciones xeneralizaes que tenderán a remitir al alborecer. Pel día van quedanos intervalos nubosos con xarabatos intermitentes, febles, dispersos ya ocasionales. L’aire sedrá sele en xeneral de componente norte y les temperatures baxarán moderadamente con una cota de nieve sobre los 1800-2000m pero sin malpenes preciptiaciones.
- El martes veremos el sol pela mañana aumentando les nubes a partir del mediudía, pa dexanos la tarde nuble y l’atapecer con agua. Les temperatures mínimes en descensu por mor del cielu poco nuboso pela nueche, mentantu que les másimes medrarán dalgo. L’aire gallegu con raches moderaes a fuertes al finar el día en puntos del llitoral y zones altes.
- El restu la selmana sedrá seliquina ente nubes ya claros o abancios y a partir del sábadu paez que llega l’iviernu, con precipitaciones abondoses, descensu bultable de les temperatures y nevaes moderaes pela cordelera pero esto yá lu diremos viendo.
