Últimu día de la seronda, mañana
llega l’iviernu a Asturies y pa quedase.
llega l’iviernu a Asturies y pa quedase.
- Alborecemos col cielu nuboso y temperatures altes, alrodiu de los 15ºC, rexistrándose nel puirtu Payares 8,6ºC.
- Güei va dir disminuyendo la nubosidá pa quedar el día con nubes ya claros o abancios, con unes temperatures mui suaves que van caltener un ambiente mui seliquino, amás l’aire sedrá sele ya variable.
- Mañana sábadu la llegada d’un frente fríu va marcar la diferenciea ente les estaciones de la seronda y l’iviernu. Anque la masa d’aire que lu acompanga nun ye mui fría va empobinanos, dende l’alborecer, precipitaciones de calter moderáu ya un descensu de les temperatures que fadrá que surda la nieve perriba de los 1300m.
- Una vegada que pase’l frente y tengamos un par d’hores sin lluvia ya inclusu cola apertura de dellos claros o abancios, l’aire de componente norte-noroeste que va soplar con raches fuertes en zones altes ya en puntos del llitoral, va apurrinos precipitaciones y xarabatos frecuentes, esto sedría yá al atapecer del sábadu que sedrán más abondosos ya intensos na cordelera centru-oriental, sobre too na divisoria y cara sur por mor del fuerte gradiente, la nieve surdirá perriba de los 1000m y la sensación sedrá de plenu iviernu.
- Seguiremos el domingu con precipitaciones y xarabatos frecuentes, intensos ya persistentes, con nevaes copioses perriba de los 1000m na cordelera , amás l’aire de componente norte-noroeste seguirá soplando con muncha fuercia, faciendo que la nevada seya más intensa na divisoria y cara sur de la cordelera con unes temperatures en descensu ya cola sensación térmica más baxa por mor del vientu.
- Durante’l riscar del llunes l’aire va rolar a componente norte y les precipitaciones van a intensificase entovía más, sobre too yá fuera de la divisoría de la cordelera, nos valles y zones llanes con nevaes de nuevu que sedrán mui copioses. Les temperatures camudarán poco y la nieve surdirá de nuevu perriba de los 1000m, dalgo más alta nes hores centrales del día.
- El martes van dir remitiendo ya espaciándose los xarabatos pero tamién baxarán les temperatures, asina como la cota de nieve que podrá surdir perriba de los 700-800m.
- El miércoles alboreceremos con una estampa perguapa ya ivernal, cola cordelera cargada de nieve, con más d’un metru nes estaciones d’esquí y los praos blancos pola xelada yá que tendremos el cielu poco nuboso o escampláu.
- El restu la selmana sedrá seliquina y fría, con xelaes nes zones favoretibles, dalgún intervalu nuboso y temperatures másimes mui contenies, pudiendo tar xelando durante tol día nes zones más altes de la cordelera, pero esto yá lu diremos viendo.
