El tiempu anticiclónicu impónse esti Sábadu Santu dexando cielos soleyeros y temperatures templaes na mayor parte del país.
La estabilidá y el bon tiempu nótense. En Xixón, el sol reinó pea mañana. Na sablera de San Llorienzo los fieles yá tienden los sos tuayes pa buscar los meyores rayos.
Aseguren que la temperatura del agua ye bona anque la diferencia de graos col esterior nun seya apta entá pa los más friolentos. Eso sí, munchos güei yá probaron l’agua del Cantábricu. Ensin rastru d’aire, el calor nun sorprendió demasiao anque les mascotes notárenlo.
Esta zona del arenal xixonés enllenóse d’actividá, paséu y deporte al igual que Salinas. Ellí la sablera tuvo más vacia anque tamién recibió a bañistes.
Nel interior y nel suroccidente’l mercuriu tamién xubió y según les previsiones los termómetros podríen superar los 27 graos.
Les terraces enllenáronse en Cangas y anque l’Aemet confirma un baxón de temperatures pa la xornada de mañana, el llunes volverán xubir.
La previsión de l’Axencia Estatal de Meteoroloxía (Aemet) pa mañana domingu confirma que, la de 2026, ye una de les Selmanes Santes con meyor tiempu que se recuerda nos últimos años.
Va ser un domingu d’estabilidá xeneralizada en tol país, con cielos azules o poco nublos.
