- Fonte: Blogue Público.es/Alfredo González-Ruibal/
Estos díes presentóse en públicu la última obra d’Augusto Ferrer Dalmau. La tema: la batalla de Cuadonga.
L’artista convirtióse nun ídolu del conservadorismu y cuenta col favor tantu de medios de dereches como d’instituciones públiques: esfruta del patrociniu del Ministeriu de Defensa y apocayá foi galardonáu pol Ministeriu de Cultura y Deporte cola medaya al Méritu nes Belles Artes. El galardón hai qu’entendelo por razones patriótiques, más qu’artístiques. Porque Ferrer Dalmau vuelve al realismu historicista del sieglu XIX ensin apurrir nada nuevo y con una técnica bastante menos depurada que la de maestros como Antonio Gisbert o Francisco Pradilla.
Sicasí, consigue conectar con un públicu ampliu gracies al estilu efectista de los llibros ilustraos de temática militar. Asocede daqué paecíu coles noveles del so amigu Pérez Reverte. En dambos casos, pesquen más allá de les cales reaccionaries gracies a los sos productos de consumu fácil y el so supuestu apoliticismu -o antipoliticismu, nel casu de Reverte. Lo suyo, vienen dicinos, tesciende les ideoloxíes. Porque lo suyo ye España.
«Para mi la Batalla de Cuadonga foi real, pero cada unu ye llibre de pensar lo que quiera»
«Nun tendría d’haber polémica por esti cuadru, pero si lu hai ye la señal de que la pintura sigue siendo un mediu d’espresión y llibertá»
El problema ye que si unu discrepa de la calidá de les obres de Ferrer Dalmau o Pérez Reverte o pon en tela de xuiciu el mensaxe políticu que tresmiten, va vese acusáu darréu d’atacar a España. Y si l’arte de Ferrer Dalmau y la lliteratura de Pérez Reverte encarnen España, nun pueden por menos que ser, amás, Arte y Lliteratura con mayúscules. Cualquier obra que s’alloñe del realismu más pedestre cuerre’l riesgu de pasar a considerase arte antiespañol y dexenerao -arte woke.
¿Cuál ye la España de Ferrer Dalmau? Como la de Pérez Reverte, xuna España d’héroes y xestes militares. La hestoria convertida en cuartel. Xuna hestoria esencialmente masculina y de violencia. Por enforma que nos intenten vender que la so obra ye apolítica, lo cierto ye que les temes que decidió inmortalizar coinciden colos del nacionalismu reaccionario dende fines del XIX y asolápense colos del franquismu: el Cid, la batalla de les Navas de Tolosa, les conquistes del Imperiu español y, más apocayá, Cuadonga.
El cuadru de Cuadonga ye particularmente esmolecedor. Non pola historicidad de la batalla –probablemente tuvo llugar en dalgún momentu y de dalguna forma— sinón polo que significa alzada a la categoría de símbolu. Si hubiera dalguna dulda, el títulu: La primer victoria. Si ye la primer victoria ye porque forma parte d’una serie. La serie ye, naturalmente, reconquistar. El pintor recupera un conceutu desacreditado historiográficamente, pero otra vegada de moda gracies a la derecha populista.
Fízolo amás tomando partíu por unu de los bandos: los cristianos del norte. Y toma partíu por ellos porque representen la verdadera España, que ye cristiana, visigoda y romana. Los musulmanes nun son más qu’un cuerpu estrañu. Anque tuvieren na Península ocho sieglos (nueve si llegamos a la espulsión de los moriscos en 1613). Dos más que los romanos. Cinco más que los visigodos. Los mesmos qu’aseguren –con razón—que nes sociedaes llatinoamericanes actuales nun ye posible dixebrar lo español y lo indíxena, tienen bien claro quien son los nós y los otros na hestoria d’España.
