‘Semando Son. Compilatoriu de música moza n’asturianu’.

La primer gran folada del folk asturianu contemporáneu producióse nos primeros años 80 del sieglu XX, cuando los gustos del públicu evolucionaron del Nuevu Canciu hacia soníos onde la reellaboración de la nuestra tradición musical s’encaraba dende otros parámetros sonoros. Naquel momentu surden les primeres formaciones d’un movimientu que diba marcar fondamente la evolución de la música d’espresión asturiana, ye entós cuando apaecen nomes como Güercu, Noega, Merlín, Trasgu… y, especialmente, Beleño y Llan de Cubel, que diben valir de modelos a siguir y dieron forma a una estética sonora y hasta visual, esta última pol trabayu d’un artista plásticu como Ástur Paredes, responsable de la mayoría de les portaes y diseñu de los discos publicaos por aquellos grupos. D’aquel procesu fundacional pasóse a otru d’estabilización de la escena, cola apaición d’una segunda fornada na que les bandes cabezaleres foron Balandrán y Cambaral; éstes dieron amás un xiru al soníu folki pasando de lo estrictamentre acústico a la combinación colo eléctrico, acoyendo tamién influyencies como’l rock, el pop o’l jazz.

«Na primer fase del surdimientu (8o’s) del folk asturianu la compañía discográfica fundamental foi FonoAstur»

Na primer fase del surdimientu (8o’s) del folk asturianu la compañía discográfica fundamental foi FonoAstur que, con Lisardo Lombardía como afalador, prácticamente dio aniciu a esti movimientu. Na siguiente (90’s), cola apaición de nueves bandes, créase’l sellu que va axuntar y esparder l’actividá que xeneren: Discos L’Aguañaz. De fechu, la so primer producción foi una casete cola que s’inauguraba la serie llamada Nuevu Folk Asturianu (1993) na que se presentaben los xixoneses Cambaral y Tuluergu. Como curiosidá, pa nun facer de menos a nengún de los dos grupos la cinta trayía un Llau A y un Llau 1, en cuenta de Cara A y Cara B. Los años noventa foron los del gran españíu del fenómenu folk n’Asturies en tolos sentíos: bandes, festivales, discos y públicu. La cantidá y variedá de formaciones que surden naquel periodu foi realmente bultable, con propuestes mui distintes ente sí, pero col mesmu enfotu d’anovación de la tradición musical asturiana y de creación d’una nueva música del país; yeren xente mui mozo que yá medrara sintiendo a toes aquelles bandes anteriores y que les teníen como referentes.

El segundu volume de la serie Nuevu Folk Asturianu (1998) foi yá un cedé compartíu por dos bandes caracterizaes por un soníu eléctrico-acústicu potente: Folkgando, que dende Ayer y lideraos pol gaiteru-saxofonista Santi Caleya ufiertaben una mui bona muestra de lo que podríemos calificar como hard-folk; y N’Arba, con componentes de diferentes conceyos (Grau, Corvera, Avilés o Cuideiru), con Xose Ambás como frontman y un soníu perfectu ente la tradición y la renovación.

La tercer entrega, amás del títulu xeneral de la serie, llevaba un subtítulu bien espresivu, Xeneración Folk (2000), nella inclúinse hasta un total de seis bandes, d’ente les que destacaben Los Gatos del Fornu, Llangres y Corquiéu, que foi la que más proyección y relevancia tuvo posteriormente; la portada del discu foi mui llamadera, obra del diseñador gráficu y daquella músicu componente de Balandrán Antón Barquero.

L’últimu d’estos discos compilatorios foi’l Volume IV (2002), nel que cinco formaciones, mayormente del conocíu como folk de cámara, asoleyaben tres pieces del so llabor. La filosofía d’esta serie yera la d’amosar el trabayu que les bandes nueves taben faciendo, apoyar la renovación nel folk del país y contribuyir al dinamismu y afitamientu d’esta escena; sicasí, tamién tuvo crítiques por parte de dalgún sector, argumentando que munches d’estes formaciones taben tovía na fase de proyectu, dalgunes d’elles de vida efímera, con repertoriu escasu o que tovía nun taben preparaes pa entrar nun estudiu de grabación. Viéndolo cola perspectiva que da’l tiempu, la esperiencia abulta positiva dafechu porque permitió fortalecer un movimientu mui nuevu, faltu de más referentes y qu’ilusionara a les xeneraciones más moces. En total foron quince los grupos que llegaríen a publicar dalguna pieza nesta colección, dellos de vida curtia y otros qu’acabaríen siendo verdaderos pegollos del folk n’Asturies; ente toos valieron pa demostrar qu’existía un movimientu diversu, dinámicu y con vocación de futuru.

Más de venti años depués, con una crisis económica pel mediu (2008) que cásique afara tolo construyío, una iniciativa del portal musicasturiana.com, dirixida por Xicu Ariza, retoma l’espíritu d’aquellos discos colectivos y llanza Semando Son. Compilatoriu de música moza n’asturianu, nel qu’axunta dellos nomes de la escena más nueva que tenemos nel país. Principia con Alicia Villanueva & Luis Álvarez Pola, qu’abren esti trabayu a la manera clasicista de l’asturianada, aquella que nes primeres décades del sieglu XX dio forma a esti estilu cola collaboración ente los compositores y los/es cantadores más importantes d’aquel momentu, fundamentalmente acompañando la voz col pianu. Alicia ye una de les intérpretes xóvenes que tán espuntando nel mundu de la canción asturiana, mientres que Luis ye un pianista mui solvente y bon conocedor de la tradición; preséntense con tres de les pieces más recurrentes nel repertoriu de la tonada, ente les que destaca una versión esquisita, con unos arreglos sobrios pero mui elegantes, de «Para castañes, Tremañes»; depués de sentilos queda ún con ganes de comprobar de lo que pueden ser quien a facer componiendo material orixinal.

Loína ye’l tríu del que faen parte los hermanos Joglar (Andrea -flauta- y Rodrigo -acordión-) y Julio Rodríguez -bouzouki-, principaron a tocar yá nel 2010 (primero col desapaecíu Elías García nes cuerdes) pero hasta agora nun publicaren nada; son tres instrumentistes perbonos que siguen la corriente del soníu atlánticu, concretamente na tendencia etiquetada como folk de cámara; la so propuesta ye la qu’emparenta más claramente esti Semando Son con aquella serie del Nuevu Folk Asturianu.

Sobre Algaire poco se pue dicir yá que nun se tenga dicho; artífices d’un primer discu sorprendente que les catapultó mediáticamente y asitióles como ún de los referentes nuevos de la música asturiana; son tres voces empastaes amañosamente (Carla Miranda, Iratxe Espina y Loreto Suárez) acompañaes d’un guitarrista y arreglista curtíu (Juan Yagüe), nes pieces d’esti trabayu siguen afondando nel so propiu soníu y ufierten una versión increyible del tema de Desakato tituláu «El mio camín», que lleven al so terrén con gustu pero ensin perder la fuercia orixinal de la composición.

Los encargaos de zarrar esta muestra de música moza asturiana son otru dúu, el de los hermanos Pablo y David Alonso, que yá tienen varios trabayos publicaos y un nome conocíu: Llevólu’l Sumiciu; soníos tradicionales, pieces populares, hits folkis, electrónica, esperimentación, programaciones… de too ello alcontramos na so propuesta, que desplieguen nunos directos intensos reforzaos poles proyecciones audiovisuales; nos temes incluyíos nesti discu compilatoriu echen mano de samples vocales d’El Presi, Mapi Quintana y Gema García (ex cantante de Corquiéu), creando ambientes agora escuros, agora baillables, llevando la música d’espresión asturiana a terrenos hasta agora desconocíos.

Amás del aspectu estrictamente musical, esti Semando Son tien tamién de manera intrínseca otru de calter social, asina lo espresa Ariza nel testu de presentación qu’apaez nel discu: «En 1998 había n’Asturies 350.000 menores de 30 años; nel 2023 son 223.000. Ye evidente la crisis demográfica y les consecuencies de más de dos décades d’emigración xuvenil. Pero ente aquel tiempu (…) y anguaño, siguió habiendo xente mozo que garró los instrumentos pa facer música n’asturianu. Y too ello pesie a los pilancos sociales, culturales, políticos y mediáticos…»; esti trabayu discográficu ye, xustamente, reflexu d’ello.

«El folk asturianu ye un continuum dende la so nacencia a principios de los años 80 hasta agora, un camín andáu gracies a bien de protagonistes, unos efímeros y otros yá inmortales»

El folk asturianu ye un continuum dende la so nacencia a principios de los años 80 hasta agora, un camín andáu gracies a bien de protagonistes, unos efímeros y otros yá inmortales. Ente toos ellos armaron un sistema musical propiu, orixinal, abiertu y plural; nesi caleyar obres como aquellos trabayos colectivos xugaron un papel d’espardimientu y visibilización. Una xera qu’esti añu retomó Semando Son, que s’abre con asturianada clásica y echa’l piesllu con folktrónica, dos visiones estremaes pero con un mesmu enfotu: siguir dando tira a la música del país.

XUNE ELIPE. Artículu publicáu orixinalmente nel Anuariu de la Música Asturiana 2023