Entrevista con La Bonturné -Merce Santos (zanfona), Santi Caleya (saxo sopranu y gaita asturiana), David Varela (curdión diatónica, voz y percusión) y David Casillas (contrabaxu)-, una de les esperiencies más tresformadores del folk asturianu.
- Entrevista nel portal MusicAsturiana.com /
- AMOSANDO #24 ?️ Conciertu La Bonturné ‘A Contraforga’
- La Bonturné Facebook /
«Depués de cuatro décades formando parte d’esti entramáu musical, tar nominaos ye un bon premiu, polo menos a la constancia»
Esti vienres 8 de payares a les 19h tien llugar nel Teatru La Llaboral de Xixón la gala final del XVI Premiu Camaretá al Meyor Cantar, l’únicu premiu institucional qu’esiste anguaño pa da-y reconocimientu a la música fecha n’asturianu o gallego-asturianu. La Bonturné con “Odisea la nuí“, Susana Gudín con “Contigo“, Ferla Megía con “Medrana a Medrar“ y Héctor Braga con “Llobatu“, son los cuatro grupos y cantares nominaos nesta edición. Dende musicasturiana.com vamos falar esta selmana cada día con ún de los artistes nominaos pa conocer por qué escoyeron esi tema, si tienen preparao daqué especial pa la final y qué supón participar nesti certame.
Entamamos el cuestionariu con La Bonturné -Merce Santos (zanfona), Santi Caleya (saxo sopranu y gaita asturiana), David Varela (curdión diatónica, voz y percusión) y David Casillas (contrabaxu)-, una de les esperiencies más tresformadores del folk asturianu. Partiendo del conocimientu bien fondu de la música tradicional y los sos instrumentos, a caballu d’un son prestosu y singular, esti cuartetu de maestros apurren un repertoriu amañosu dafechu pal baille, nuna llinia bal-folk tradicional.
¿Qué supón pa vós la nominación nesti premiu y qué supondría ganalu?
Siendo conocedores del altor y la calidá d’anguaño na música n’asturianu, al pesar de les trabes, con propuestes maraviyoses y motivu d’arguyu, pa nós, depués de cuatro décades formando parte d’esti entramáu musical como mediu de vida, tar nominaos ye un bon premiu, polo menos a la constancia (rises). Ganalu, creyemos que nos daría una bona y mui necesaria promoción, pero, sobremanera, daríanos munchu aliendu, a nós y a tola xente que trabaya al nuesu rodiu… y un premiu por cantar na llingua de nós, ye, polo menos, ilusionante.
¿Por qué escoyistis esti cantar pa concursar?
Igual na nuesa carrera discográfica’l porcentax de repertoriu vocal nun ye lo que más abonda, pero siempres nos llamó l’atención, inclusu dende que yéramos La Bandina, que les nueses pieces cantaes algamaben ciertu ésitu. Nesti discu, A contraforga, hai solo dos temes cantaos, ún con parte de lletra tradicional y esti, “Odisea la nuí”, con lletra orixinal de Paco Álvarez y David Varela, quien tamién fixo la propuesta músical. Podríemos dicir que’l puxu final pa presentanos diónoslu’l mesmu Paco; él mesmu valoró muncho’l méritu que tuviéremos al iguar y afayar esa pequena y xugona versión de la so épica Odisea y convertilo nesti cantar mordaz, qu’amás consideramos que quedó elegante y bien allegao al nuesu rexistru de música fecho pa baillar.
¿Tenéis daqué especial preparao pa l’actuación del domingu?
(Rises) Rímonos porque ye cierto que, de manu, alloriamos un pocuñín valorando sobremanera delles aportaciones escéniques y coreográfiques, qu’a lo postrero fuimos refugando. Creyemos que tenemos que ser honraos y fieles a nós mesmos, al nuesu proyeutu y al nuesu estilu; La Bonturné somos cuartetu. De toes formes, siendo una “Gala” y pol respetu que-y tenemos al públicu y al actu en sí mesmu, habrá que pintar la pestaña y engalanase colos nuesos meyores fatos… como diz la lletra «de la fábrica textil, que tan triunfando dende Ítaca a París» (más rises).
Sienti “Odisea la nuí” de La Bonturné
