- Fonte: Actualidá Asturies /
- Los talleres dexen sensibilizar al sector deportivu sobre la llei LOPIVI y el protocolu autonómicu nesti campu
- Los conceyos d’El Franco, Parres y Avilés acueyen esti mes les sesiones formatives gratuites
La Conseyería de Cultura, Política Llingüística y Deporte, en collaboración con Derechos Sociales y Bienestar, empieza esta tarde n’A Caridá (El Franco) la formación pa prevenir la violencia contra menores nel deporte. Con esta midida, el Gobiernu d’Asturies demuestra’l compromisu colos derechos de la infancia y trabaya de contino pa la so protección en tolos ámbitos, incluyíu’l deporte.
Los talleres qu’empiecen güei nel conceyu d’El Franco van siguir en Parres, el xueves que vien, y el día 26 d’esti mesmu mes n’Avilés. Con ellos da cumplimientu a la Llei Orgánica 8/2021, de 4 de xunu, de protección integral a la infancia y l’adolescencia frente a la violencia (LOPIVI) y al protocolu aprobáu apocayá pol Executivu autonómicu nel mesmu sentíu.
Les sesiones formatives tienen una duración de dos hores y son gratuites dafechu pa les persones que trabayen con menores d’edá n’entornos deportivos, bien seya personal d’instalaciones, federaciones o clubes asturianos. N’acabando, los participantes van recibir un diploma d’aprovechamientu.
Manuela Fernández, directora xeneral d’Actividá Física y Deporte; Antonia Fuentes, Lletrada del Menor, y Pablo Moro, coordinador d’UNICEF n’Asturies, van ser los encargaos d’impartir la docencia. Amás, va participar tamién Estefanía Fanjul, de l’Asociación Sin Límites, que va ser la encargada d’esponer exemplos de bones práctiques nel mundu deportivu.
El protocolu d’actuación énte la violencia contra les y los menores d’edá nel deporte aprobólu anguaño’l Gobiernu d’Asturies y pue consultase nesti enllaz: https://tinyurl.com/3ah7pzvx
