Premiu RTPA a meyor videoclip asturianu nel Fivoviedo

El FIVO premia a “Valiente” d’Héctor Braga
como’l meyor videoclip asturianu d’esti añu

Esti fin de selmana celebróse’l FIVO –Festival Internacional de Videoclips de Oviedo-, onde la producción asturiana tenía un espaciu señaláu cola Sección Asturias. Nella taben seleccionaos ocho pieces audiovisuales de les que cinco yeren d’artistes de la música n’asturianu: “Divina” de Llevólu’l Sumiciu, “Xatu” de Ferla Megía, “Funeres S/N” de Sastre & Al Altu la Lleva -dirixíu por Daniela Cohen-, “Valiente” d’Héctor Braga ft. Víctor Manuel -dirixíu por Antonio Llaneza-, y “Corales de cristal” de Xera -obra de Carlos Díaz Sánchez-. A la fin, el videoclip qu’algamó’l Premio RTPA a mejor videoclip asturiano foi’l de “Valiente” del multiinstrumentista llangreanu.

“Valiente” ye’l primer cantar d’Héctor Braga que trata la guerra n’Asturies de 1936-1937. Ye asina «por cincunstancies familiares» según declaró’l músicu nuna entrevista a MUSICASTURIANA.COM: «Nunca nun quixi emocionar a mio güela n’abondo, porque adorábala. Yo criéme colos mios güelos y ella morrió hai un par d’años. Yera d’una familia de fondu raigañu anarquista, con padres y tíos trabayando (y hasta viviendo, según tengo entendío) nel centru obreru La Justicia de La Felguera. So tíu Benjamín Arrizabalaga Antuña allegó a xefe de la CNT en Sama y fue capitán d’una compañía del Batallón 209 Celesto. Fusiláronlu n’Uviéu el 3 de mayu de 1938. Ella emocionábase falando d’elli y nun yera tema agradable».

«“Valiente” pensóse como una historia íntima, metanes del monte. Llamé a una collacia de va más de venti años, Fe Santoveña, y pidí-y contautos de recreadores a títulu personal. Non quería meter más de quince persones de nenguna asociación nin coses d’eses pola guerra (nunca meyor dicho) que podía danos la xestión. Ella dióme’l contautu de Félix Feito, que protagoniza’l videu, y elli mesmu xestionó tola xente qu’andecha nel videoclip col mayor procuru d’armes y vistimenta. Llueu, el Ayuntamientu de Llanes iguó montes y trincheres mientres que l’andecha de Víctor Manuel fizo espoxigar el trabayu hasta’l resultáu final, que ye espectacular y ta llegando a muncha xente», deplica Braga sobre una cuidada obra audiovisual qu’agora, amás del reconocimientu del públicu, yá tien el de la crítica.