Los gallos canten y el ganáu ta sueltu:
l’alvertencia de Llanes al turismu urbanita
Fonte: La Voz / cartelu
Esta selmana empezó la instalación de los nuevos cartelos del Conceyu esplicando a los visitantes de ciudá les particularidaes de la redolada rural onde se van agospiar. «Bienveníu a Llanes, conceyu d’excelencia rural» ye la frase qu’encabeza los nuevos cartelos propuestos pola conceyalía de Agroganadería encabezada por Xuan Valladares y que tienen como oxetivu alvertir a los urbanitas de la realidá la realidá del mundu rural.
Una iniciativa que surde arriendes de les quexes de los turistes de ciudá por coses tan normales nel campu como’l mugido de les vaques o los cantares de los gallos a primer hora de la mañana. Les quexes empezaron a aumentar cuando en plena pandemia’l turismu rural empezó a tar en puxanza y la xente de les ciudaes optó por visitar los pueblos asturianos en busca de paz ensin tener en cuenta que’l campu tien les sos propies característiques.
L’oxetivu de los cartelos ye ameyorar la convivencia ente los turistes y vecinos de la zona, alvirtiendo a los visitantes de lo que van poder atopase nel conceyu, dende ganáu suelto, gallos cantando ceo, golor a cuchu y campos abonaos hasta caminos asfaltaos estrechos onde tendrán de conducir con precuru.
Empezará asitiándose diez cartelos a la entrada de los valles, parroquies y ámbitos rurales del conceyu llaniscu y, darréu, van asitiase otros diez. Esti tipu d’iniciatives yá se lleva a cabu dende va años n’otros países como Francia y surdió cola idea d’alvertir a los visitantes sobro les singularidaes del mundu rural y les molesties y ventayes qu’estes trai.
