Ochobre rexistró’l segundu meyor datu de visitantes de tola serie histórica.
La campaña de turismu interior ¿Seguru que conoces Asturies?, dirixida a fomentar el consumu de turismu rural per parte de la población asturiana, remató’l so primer mes a valir con una gran acoyida. Asina, el porcentaxe de turistes de la comunidá agospiaos nesti tipu d’agospiamientos aumentó n’ochobre un 31,2% respectu al mesmu mes de 2023 y les nueches d’estancia aumentaron un 42,4%, hasta les 2.600, lo qu’acota l’ésitu de la iniciativa.
La campaña púsose en marcha’l 27 de setiembre, coincidiendo col Día Mundial del Turismu, y atópase en fase de desenvolvimientu. El so oxetivu ye fomentar les escapaes interiores como la opción más cómoda, económica y ecolóxica de viaxar. Trátase d’una llínea d’acción dotada con 250.000 euros que pretende reforzar la desestacionalización y favorecer un beneficiu directu nel mediu rural.
Según les encuestes d’ocupación espublizaes güei pol Institutu Nacional d’Estadística (INE), Asturies recibió a 215.843 turistes y rexistró 433.289 estancies n’ochobre. Estes cifres suponen, respectivamente, el segundu y el tercer meyor datu de la serie histórica y les más altes pa un mes d’ochobre ensin ponte del Día de la Hispanidá, qu’anguaño coincidió en sábadu.
El descensu frente al añu pasáu, común a les comunidaes de Galicia y Cantabria, foi del 4%, en turistes, y del 10,1%, n’estancies. Sicasí, el cómputu global del exerciciu caltiense en máximos, con 2.574.071 visitantes y 6.193.691 pernoctaciones, lo que representa porcentaxes de xubida del 2,7% y del 0,9%, respectivamente, sobro l’acumuláu de 2023.
En términos de rentabilidá, el sector sigue ameyorando. Ochobre cerró con medríes nos dos variables analizaes pol INE pa hoteles: la tarifa diaria promediu algamó los 68,75 euros y los ingresos per habitación disponible, los 35,37 euros. Estes cifres suponen aumentos del 2,6% y 1,32%, respectivamente, sobro ochobre de 2023
