ESPERTEYU s.m.: ‘Mamíferu insectívoru [pequeñu, davezu de color escuru, con una membrana en forma d’ales cola que pue esnalar]’.
- Esta voz asturiana xustifícase dende’l llatín UESPERTILIO, -ONIS, con pérdida de U- inicial, si bien suelen suxerise dos posibles víes de creación: o bien una forma regresiva a partir del acusativu UESPERTILIONE > esperteyón, al percibir esa terminación como un aumentativu (esperteyón > esperteyu); o bien un posible restu del casu nominativu.
- Los heriedes d’esti étimu, amás de nel noroeste ibéricu, concéntrense nel dominiu italorrománicu. Asina, tres d’un cambiu de sufixu (-ello < ELLU), diferentes metátesis y procesos de reduplicación espresiva (ensin descartar analoxíes con otres voces), afayamos l’italianu toscanu «pipistrello», o’l sardu «pipistreddu».
