La cueva La Lluera, con dalgunos de los grabaos a la izquierda. / M. L.
Cultura va reabrir al públicu la cueva de La Lluera a partir del próximu sábadu
Les reserves puen realizase de miércoles a domingu, n’horariu de 15 a 17 hores, al traviés del teléfonu 684 800 385
Trés años dempués del so zarru’l Principáu va reabrir al públicu, con visites empuestes, la cueva de La Lluera, na parroquia uvieina de San Juan de Priorio. Nun va haber qu’esperar enforma por que la apertura sía una realidá yá que ta previstu que se produza yá’l sábadu, 28 d’avientu. Les visites van facese con guía empón hasta la primavera, toos les fines de selmana (sábadu y domingos), con grupos con un máximu de seis persones por pase. Va Haber posibilidá de reserva, llamando al teléfonu 684 800 385, n’horariu de 15 a 17 hores, de miércoles a domingu. Tal como s’indicaba ayeri mesmu dende la Conseyería de Cultura, Política Llingüística y Dportes, les reserves yá tán disponibles dende esti sábadu.
La Xunta aprueba una proposición pa reabrir la cueva de la Lluera, una xoya del arte paleolítico.
Cola apertura de la cueva va cumplise asina colo alcordao na Xunta Xeneral del Principáu yá que na Comisión de Cultura aprobárase va trés meses una Proposición Non de Llei (PNL) pa reabrir un enclave bien singular y da-y asina’l valor que merez. La Conseyería de Cultura abrió al públicu la cueva per últimu vegada nel branu de 2021.
La entrada al xacimientu:
Cuándo: Sábados y domingos.
Cómo: Grupos bien amenorgaos.
Imprescindible reserva telefónica (674800385), llamando de miércoles a domingu, de 15 a 17 hores.
Tarifes: Xeneral: 3,13 €; amenorgada: 1,62 €; abonarase n’efectivu na taquilla de la cueva.
El conxuntu de la Lluera ta compuestu per dos abrigos allugaos a la vera del ríu Nalón y componen el sitiu con arte esterior paleolíticu más importante de la rexón cantábrica, según los espertos. Les representaciones gráfiques del abrigu principal fueron afayaes en 1979 pol grupu Polifemo. El segundu abrigu del conxuntu o Lluera II foi identificáu en 1980 por dos miembros del grupu d’investigación de la Lluera I. Ye una pequena abertura nel frente caliar, onde se grabó un conxuntu de motivos triangulares, acompañaos de siquier una venada.
El xacimientu na so totalidá destaca pola so elevada cantidá de grabaos, apaeciendo caballos, venaes, uros, bisontes y cabres, tamién pola calidá y la técnica de resalte con que fueron realizaos.
Dende la Conseyería encamienten que pa llegar a La Lluera déxese’l coche nel aparcamientu allugáu al pie de la ilesia de Priorio, «yá que na localidá de San Juan nun hai espaciu abondu p’aparcar». Dende ellí puede empecipiase un paséu de cerca d’un kilómetru hasta’l caserío de San Juan de Priorio y, una vegada nel pueblu, tomar una sienda descendente que pasa percima del ríu Nalón y conduz hasta la finca que da accesu a la cueva. Esti percorríu completase n’unos 25 minutos.
