Nuria Rodríguez alerta del aumentu esponencial d’agresiones físiques al colectivu LGTBI en zones d’ociu y espacios públicos. “El respetu nun ye una opción personal, ye un consensu social y uno obligación llegal”, asegura la directora xeneral en presidiendo la xunta añal del Observatoriu Asturianu contra la LGTBIfobia
La directora xeneral de Participación Ciudadana, Tresparencia, Diversidá Sexual y LGTBI, Nuria Rodríguez, sollertó esta tarde del aumentu esponencial” de les agresiones físiques al colectivu LGTBI, al producise una medría d’un 133,3% de les mesmes al respective de 2023. D’eses agresiones, la mayoría tienen llugar en zones d’ociu nocherniegu y n’espaciu públicos, con un 600% más d’agresiones con presencia de violencia física.
Nesti sentíu, esplicó que, mientres la solicitú d’asistencia xurídica o psicolóxica por agresiones verbales menguó nesti últimu añu, asocedió lo contrario cola violencia física, detectada especialmente en redolaes próximes a estadios de fútbol. Estes cifres correspuenden a los datos arrexuntaos al traviés del teléfonu d’asistencia para víctimes de la LGTBIfobia que xestiona’l colectivu Xega.
Para la directora, les cifres mentaes indiquen qu’esiste “un problema seriu n’Asturies qu’obliga a les alministraciones públiques a convertise nun dique de contención y a realizar inversiones series para atayar la LGTBIfobia”. “El respetu polos y les demás nun ye xuna opción personal, ye un consensu social perampliu n’Asturies y una obligación llegal”, sorrayó.
Rodríguez considera que “tamos solo énte la punta del iceberg”, porque cree qu’esisten bien de más casos que nin siquier se denuncien, que se despinten, porque cada vez hai más mieu”. Amás, aseguró que ye necesariu tomar midíes inmediates nes zones d’ociu nocherniegu y faer una reflexón sobre los motivos que faen necesaria la creación d’una Llei LGTBI que protexa los derechos del colectivu n’Asturies.
La directora xeneral pronuncióse nestos términos minutos antes de presidir, en sustitución del conseyeru Ovidio Zapico, la xunta añal del Observatoriu Asturianu contra la LGTBIfobia, segunda celebrada mientres l’actual llexislatura.
Amás de dar a conocer l’informe añal sobre la LGTBIfobia na nuesa comunidá, la xunta d’esta tarde tamién encetó l’estáu actual del borrador de la futura Llei LGTBI asturiana, les implicaciones d’esta postrera pal observatoriu, el protocolu d’actuación d’esti organismu énte les declaraciones *LGTBIfóbicas de cargos públicos y l’inclusión de nueves entidaes.
L’observatoriu ye un órganu de consulta y participación adscritu a la Conseyería d’Ordenación de Territoriu, Urbanismu, Vivienda y Derechos Ciudadanos. Foi creáu en 2021 pa emprestar asesoramientu y collaboración institucional al Gobiernu del Principáu coles mires de defender los derechos d’estes persones y atayar les acciones d’intolerancia que los afecten pola so identidá sexual.
Cuenta con dolce vocales, ente los que figuren otros representantes del Executivu autonómicu, los colexos d’abogaos d’Uviéu y Xixón, la Oficina d’Asistencia a les Víctimes de Delitos Violentos, la Federación Asturiana de Conceyos, la Unidá d’Igualdá de la Universidá d’Uviéu, les organizaciones sindicales y los colectivos LGTBI.
El númberu al que pueden dirixise les persones que fueren víctima de dalgún incidente, agresión o situación de discriminación por razones de LGTBIfobia ye’l 900 70 11 38.
