Mieres prepara actividaes y un puntu d’observación nel picu Polio para l’eclís total de sol del 12 d’agostu. El Conceyu va instalar una carpa, va cuntar con guíes para siguir el fenómenu y va haber zona d’ociu, con comida y bébora. LNE
Mieres quier atraer a visitantes con motivu del eclís total de sol del próximu 12 d’agostu. El conceyu asítiase na franxa de mayor visibilidá d’esti fenómenu astronómicu y tien previstu allugar un el puntu oficial de visualización na base del Picu Polio. Ellí va haber guíes, por que los visitantes puedan ver l’eclís con seguridá, y van instalase tou tipu d’atracciones, convirtiendo la xornada n’una fiesta.
Primeramente, el Conceyu mierense prepara actividaes de preparación, como un taller de formación sobro eclises y les directrices pa velo, que se va desenvolver el 4 de xunu. Tal que esplicaron dende’l gobiernu local, «pa la mesma xornada del 12 d’agostu va haber guíes d’interpretación del eclís, food trucks y una carpa d’alcuentru», tollo nel monte Polio, una redolada que nos últimos años ta potenciándose como zona d’ociu al campu.
Trátase d’una esperiencia que tamién ufierta’l Conceyu d’Ayer; ellí atópase unu de los meyores miradores del cielu asturianu, el mirador de Cotu Bellu, asitiáu a casi 1.200 metros d’altitú, «un auténticu balcón natural con una panorámica de 360 graos y con una calidá de cielu esquisita para esfrutar de los eventos astronómicos que s’asoceden a lo llargo del añu». Nos últimos meses trabayóse nel diseñu d’una completa programación que se va desenvolver ente esti mes y agostu, como preparación pal esperáu eclís. Coto Bellu va ser l’escenariu de les actividaes previstes dientro d’esti ciclu.
- La próxima cita va tener llugar el domingu 12 d’abril, cola celebración del segundu taller d’observación solar.
- Nel mes de mayu, les xornaes dedicaes a esta actividá desenvolveránse los díes 1 y 31.
- En xunu programóse un taller especial con motivu del solsticiu de branu.
- El domingu 21 de xunu, el sol va ser el protagonista d’una sesión d’observación con telescopios d’alta gama dedicaos puramente al estudiu solar. Nesta fecha, que marca l’entamu del branu, los participantes van poder afayar dalgunos de los secretos qu’escuende l’astru rei. Va ser toa xuna esperiencia visual, desenvuelta so les máximes condiciones de seguridá óptica.
- En xunetu volverá esfrutase d’esta actividá’l día 26.
- Yá n’agostu, y como preludiu al eclís solar, va celebrase un maratón solar los díes 8 y 9, xornaes dedicaes puramente a la observación de la nuesa estrella.
