El Festival de Cerveza Artesano más movíu d’Asturies vuelve un añu más. Y sí, sigue siendo d’accesu llibre y nos Xardinos de la Pinacoteca Eduardo Úruculo de Llangréu.
Esta edición fai especial ilusión, porque amás de los proyectos artesanos nacionales que nos acompañen cada añu, vamos contar con 5 marques internacionales que viaxen hasta equí pa compartir la so cerveza con nós.
Pa nós ye una oportunidá mui guapa de siguir abriendo’l festival, de conocer xente nuevo, otres formes d’entender la cerveza y, sobre too, de poder compartilo con vosotros.
Vas poder probar cerveces de munchos estilos distintos, falar colos cerveceros, descubrir sabores nuevos o volver a esos que yá sabes que nunca fallen. Cerveces feches con tiempu, con cuidáu y con munchu trabayu detrás.
Al final, esti festival ye eso: xuntanos, descubrir cerveza artesano y pasar un bon fin de selmana.
Foodtrucks
El festival vuelve apostar pola variedá y por dar espaciu a propuestes pa tolos gustos. Dende opciones veganes y vegetarianes hasta propuestes con carne, sabores del mundu y cocina con raigañu, la zona gastronómica ye una parte fundamental de la esperiencia.
Nesta edición vamos contar con 8 foodtrucks, que van poner el toque gastronómicu perfectu pa acompañar les cerveces del festival: Los Cabornos, Curuxera, Nun Pases Fame y Mcanudos comida argentina.
El festival vuelve ser tamién un espaciu pa escuchar, mirar y descubrir la cerveza y la cultura dende otros llugares.
Nesta edición vamos tener la grabación en directu del podcast “Birra en ruta”, de Víctor Perezagua, que va mantener distintes charres con maestros cerveceros participantes nel festival, compartiendo esperiencies, histories y tolo que hai detrás de cada proyecto.
La parte visual va venir de la mano d’una esposición fotográfica con fotógrafos llangreanos, centrada nel mundu del trail nel conceyu, con imáxenes de carreres como’l Trail Mineru La Mudrera o’l Trail Valle de Samuño, onde monte, esfuerzu y paisaxe van de la mano.
Y amás, el «Pozu Creativu», un espaciu abiertu a la creación en toles sos formes: ilustración, pintura, escultura, fotografía, cerámica, moda, bisutería, figurines y más. Un llugar pa dar visibilidá al talentu y siguir faciendo del festival un puntu d’alcuentru ente la cerveza y la cultura.
Domingu a les 12:30, XUEGOS INFANTILES
