La música ta presente na esposición Cartelos n’asturianu (1976-2005) del Muséu del Pueblu d’Asturies. Pue visitase una esbilla de los 1983 cartelos venceyaos a la cultura, la política y los movimientos sociales que la Fundación Belenos donó. Musicasturiana.com
Hai unos díes inauguróse nel Muséu del Pueblu d’Asturies la esposición Cartelos n’asturianu (1976-2005), con una esbilla de la colección de 1983 cartelos que la Fundación Belenos donó en 2023 a esta institución cultural. Dientro l’amuesa de cartelos que pue visitase, hai espuestos dellos rellacionaos cola música n’asturianu: ún d’un conciertu pola oficialidá, el de la I Muestra de Folklore Astur, del III Alcuentru de la Canción Asturiana, de nueches celtes o del llanzamientu del discu Glaya un país de Dixebra y del Ferruñu de Xéliba.
La Fundación Belenos naz en 1983 col oxetivu d’estudiar, caltener y esparder la cultura asturiana en toles sos manifestaciones, sobre manera’l patrimoniu tradicional y célticu. Una de les sos xeres foi la de compilar cartelos escritos n’asturianu o qu’anuncien actividaes de promoción de la cultura asturiana. Estos pertenecen a delles estayes de la sociedá; tando la mayoría d’ellos venceyaos a la música, les fiestes y les nueches celtes, la política, l’ecoloxismu y la defensa de la llingua asturiana. Munchos d’estos cartelos, obres efímeres, namás se caltienen nesta colección, que tamién pue vese nel archivu de Fondos Gráficos de Xixón.
La colección de Belenos ye tamién una muestra del cartelismu asturianu nesti periodu de 1976 a 2005, nel que conviven una estética bastada en motivos del arte popular, célticu y prehistóricu con un diseñu mui contemporáneu. Los autores son ilustradores profesionales y artistes, asina como dibuxantes aficionaos y militantes d’esti movimientu en defensa de la llingua asturiana. Son, a la fin, 1983 cartelos que formen un testimoniu imprescindible pa conocer el movimientu modernu de reivindicación llingüística, que surde na Transición Democrática con Conceyu Bable y el llema Bable nes escueles.
