- Fonte: Turismo Asturias /
La gastronomía ye una de les reines de la seronda n’Asturies. Cola llegada de “la seronda” empiecen fiestes y eventos en redol a la bona mesa y a los productos de temporada, momentos que se compaxinen con otres actividaes lúdicu-festives propies de dómina serondiega. Equí te suxurimos un sabrosu itinerariu poles meyores cites gastronómiques de la seronda n’Asturies, declaraes d’Interés Turísticu.
Festival de l’Ablana. Del 4 al 6 d’ochobre en L’Infiestu (Piloña). La localidá de L´Infiestu acueye una nueva edición del Festival de l’Ablana, un productu de temporada qu’adquier gran protagonismu nel entamu de la seronda.
Piloña ye un territoriu bien venceyáu a la tradición rural y natural asturiana nes sos múltiples manifestaciones: montes, artesanía, madera, agroalimentación ecolóxica, turismu rural, etc. Por esta razón, esti festival ye una cita lúdica y cultural de gran tradición nesti territoriu, y tien un programa d’actividaes festives venceyaes al mercáu tradicional, esposición d’artesanía y productos agroalimentarios, esposición d’aves, esposición d’artesanía de la madera, campeonatos de bolos, etc. Tou ello rematáu coles típiques verbenes.
Fiesta de la Vendimia del Vinu de Cangas. Del 11 al 13 d’ochobre en Cangas. La Fiesta de la Vendimia ye única n’Asturies, ente otres razones porque’l suroccidente asturianu y principalmente Cangas ye la única zona que destaca pola so producción vitivinícola nel ámbitu del Principáu, con una tradición que se remonta a la Edá Media y con un tipu de viñeos de monte que faen d’esta viticultura una actividá verdaderamente heroica.
La escenificación del tresporte de la uva nun carru del país y la tradicional pisada d’uva son dalgunos de los principales actos d’esta fiesta, y compleméntense con cates de vinos DOP de Cangas, mercadín, puestos d’artesanía, vienta de productos tradicionales, visites a bodegues y actividaes pa neños, tollo incluyíu nun gran programa lúdicu-festivu.
Fiesta gastronómica del Desarme. 19 d’ochobre n’Uviéu. Una de les manifestaciones gastronómiques con más enraigono de cuantes se celebren na rexón a lo llargo del añu. Esti afamáu eventu, que vien celebrándose con una gran acoyida dende fai más de 50 años, ye la gran cita gastronómica uvieina na que participen tou tipu de restoranes, sidreríes y cases de comíes.
El menú del Desarme ufiértase cada 19 d’ochobre nos restoranes de la ciudá, tando compuestu por garbanzos con bacaláu y espinaques, dureces y arroz con lleche. El Desarme d’Uviéu ye una tradición que se remonta al añu 1836, cuando les autoridaes d’entós gasayaron con un ranchu de garbanzos con tocín a los combatientes de les guerres ente carlistes ya isabelinos. La ciudá anímase nesos díes con recreaciones históriques, concursos culturales, el capítulu de la Confrería del Desarme, etc. Son díes de muncho ambiente n’Uviéu.
Certame del Quesu Gamonéu. 26 y 27 d’ochobre en Benia d’Onís (Onís) Benia d’Onís acueye la celebración del Certame del Quesu Gamonéu, nel que cada añu escueye a los meyores productores de les variedaes del Puertu y del Valle. Trátase d’un eventu que se consolidó a lo llargo de los años convirtiéndose nun referente n’Asturies, y al que se-y fueron sumando más actividaes como la Feria de los Picos d’Europa, una amuesa d’otros productos y artesanía de la contorna. Amás, unu de los momentos destacaos ye la llectura del pregón, y tamién la entrega de los premios Gamonéu d’oru. El programa complétase davezu con distintes cates y degustaciones. Esti certame ye l’eventu promocional más importante venceyáu a la ellaboración d’unu de los quesos artesanales con mayor tradición y excelencia de too el Principáu d’Asturies: el Gamonéu.
Feria del Miel de Boal. 2 y 3 de payares en Boal. La Feria del Miel de Boal ye un eventu que cunta con más de trés décades d’antigüedá, y ye tou un referente nel calendariu lúdico y festivo d’Asturies. Un ampliu programa d’actos culturales y turísticos fai esta feria una cita bien curiosa, qu’amás ye una ocasión ideal pa conocer la capital del conceyu, y tamién otros llugares d’interés nes proximidaes. El concursu de platos ellaboraos con miel ye un curiosu más d’esta fiesta, qu’amás-y apurre un plus d’orixinalidá y tradición a un tiempu. Amás, l’artesanía y otros productos agroalimentarios como’l quesu son protagonistes d’un eventu qu’axunta a cientos de persones a lo llargo de los dos díes de mercáu.
Festival del esfoyón y l’amagosto. 9 de payares en Navelgas (Tinéu). Navelgas, en Tinéu, acueye la Nueche Máxica y el Festival del Esfoyón y Amagüestu, que remembra les vieyes tradiciones populares de l’Asturies rural.
El festival intenta retratar cola mayor exactitú los “esfoyones” d’antaño, nos que los vecinos del pueblu xúntense nuna casa pa esfoyar el maíz d’esta familia y ayudar darréu a enrestralo y colgar de los corredores. Xuntes que suponíen un acontecimientu social, onde persones de toles edaes xúntense pa charrar, cantar, ya inclusive los más nuevos aprovechaben pa cortexar. La esfoyaza conviértese nuna celebración onde nun faltaben los cuentos, les lleendes, les tradiciones, les folixes y cantares.
L’Esfoyón empieza al escurecer, nel barriu de Navelgas de Riba, que s’engalana pa la ocasión. Les cais cúbrinse de paya y allúmense con antorches. Los vecinos vístinse con ropaxes antiguos y les distintes Asociaciones Culturales encárguense de realizar diversos ágapes – frixuelos, castañes, tortes de maíz, bollu preñao, o mantega recién desnatá -, ente otros.
Coles mesmes, otru momentu importante ye la entrega de la ‘Panoya d’Oru’, habiendo de siguío degustaciones y actividaes infantiles. Los más nuevos parten la garutsa (anís de guindes caseru y oruxu), café de pucheru y sidra del duernu recién fecha qu’ayuden a sobrollevar la fría nueche de payares. Los baxos de les paneres y les cortes son ocupaos por artesanos de la contorna que faen xuna pequena demostración del so trabayu. Asina podemos atopanos al madreñeiro, el cesteiro, el ferreiro, etc.
Fiesta de los Nabos. 11 de payares en Sotrondio (Samartín del Rei Aurelio). La localidá de Sotrondio, capital de Samartín del Rei Aurelio, celebra la Fiesta de los Nabos. Imaxe de la Fiesta de los Nabos (Sotrondio, Samartín del Rei Aurelio). Restoranes y sidreríes de Sotrondio y contorna ufierten el menú tradicional, compuestu por pote de nabos, un clásicu de la cocina local que se remonta a los años 70, y que tien como base un productu de la tierra qu’abonda nos meses de seronda – los nabos -, cocinaos a poco fueu y acompañaos por compangu de primera calidá (chorizu, morciella, tocín y carne de gochu) -. El menú se completa con dureces y casadielles.
Les xornaes gastronómiques inclúin un ampliu programa festivu. Hai pasacais, sesión vermú, concursu gastronómicu, teatru, karaoke, la feria del miel, la ceremonia de distinción de los Fíos Predilectos, conciertos y verbenes, ente otres actividaes.
Fiesta de los Humanitarios. 11 de payares en Morea (Ayer). Los Humanitarios ye una asociación que toma’l nome del patronu de la parroquia, y que toma múltiples actividaes: gastronómiques, culturales y un llargu ecétera. Tien como fin primordial l’ayuda solidaria para colos más desfavorecios, amás del espardimientu de la cultura asturiana.
El 11 de payares ye’l día más esperáu por tolos ayeranos: San Martín. A les 10:00 hores de la mañana l’Alborada, cola presencia de grupos de bandes de gaites y bandines que van llevar la música por tolos barrios de la localidá p’anunciar que la fiesta yá ta en marcha. Acompañarán grupos de baille tradicional asturianu. Sobro les 10:30 hores una comitiva de gaiteros va visitar la Residencia de Persones Mayores en Sotiel.lo. Pa dar pasu a les 11:00 hores a la Misa solemne n’honor al patrón San Martín. Al rematar la misa, tien llugar la Puya del Ramu.
Y yá pa unir del mediudía’l gran desfile de gaiteros, grupos de baille tradicional y xarrés/carroces, al cargu de les llamaes xandas, que son peñes d’amigos. Alredor de les trés y media, va tener llugar la tradicional comida: fabes, casadielles y panchón – postre típicu del Conceyu d’Ayer -. Esti menú, esi día, sírvise en tolos chigres del conceyu, siendo habitual dexar la reserva d’un añu pa otru. Pela tarde, la chicolatada infantil y pa rematar el colofón los fueos artificiales.
Les Cebolles Rellenes. 30 de payares en L’Entregu (Samartín del Rei Aurelio). Coincidiendo cola festividá de San Andrés, la última fin de selmana de payares, les Cebolles Rellenes, fiesta gastronómica de gran animación celébrase per tolo alto na localidá de L’Entregu, en Samartín del Rei Aurelio. Decenes de restoranes, chigres y sidreríes sirven el menú, compuestu de cebolles rellenes de bonitu, ración de dureces y casadielles de postre.
L’orixe d’esti sabrosu platu atribúyese-y a la cocinera Aniceta Fueyo, popularmente conocida como La Nina, quien dempués de la Guerra Civil, y mientres la Cuaresma, apinó l’inxeniu énte la necesidá y escurrió un platu de cebolles rellenes a base de un sofritu con migues de bonitu pa sirvir una xinta a dellos sacerdotes qu’allegaren al chigre de La Llaguna. A partir d’esi momentu, les cocineres Aurora y Belarmina, del restorán La Conda, recoyeron el testigu de la ellaboración d’esti platu, que progresivamente foise estendiendo hasta qu’adquirió’l calter de festividá gastronómica como güei conozse. Y asina surdieron les Cebolles Rellenes, pa gayola de los cielos la boca de propios y foranos.
Xornaes gastronómiques del Pote. Del 30 de payares al 9 d’avientu en Turón (Mieres). Les Xornaes gastronómiques del Pote son un acontecimientu bien orixinal, yá que se centren nuna actividá gastronómica bien enraigonada n’Asturies, como ye la degustación d’un bon pote asturianu en plena seronda, y qu’amás nel Valle de Turón tien singularidaes específiques, pos se trata d’un pote «más probe, más aguáu, con más grasa por que fartuque (enllene) y con algunes fabes espeñicaes por qu’engorde el caldu», tal como comenten los paisanos.
Estes xornaes, que se celebren dende fai más de venticinco años, coincidiendo cola festividá de Santa Bárbara – patrona de los mineros -, tienen como escenariu unu de los valles más representativos de la minería y el patrimoniu industrial d’Asturies: el de Turón, nel conceyu de Mieres.
Ello ye que el Pozu Santa Bárbara foi declaráu Bien d’Interés Cultural en 2010, y puede conocese con una visita empuesta. Amás, tola redolada natural ta declaráu como Paisaxe Protexíu de les Cuenques Mineres. Coles mesmes, ente les manifestaciones relixoses d’esta fiesta destaca la misa cantada pol Coru Mineru y la procesión de Santa Bárbara. Amás, tien llugar un emotivu actu con ufrienda floral en memoria de los mineros finaos nes mines del Valle de Turón.
Fiesta Gastronómica “La so Excelencia la Fabada”. Del 4 al 15 d’avientu en La Felguera (Llangréu). La fabada tien la so fiesta en La Felguera, unu de los llugares d’Asturies onde más enraigono y calidá atesora la gastronomía tradicional asturiana. Asina que dende 1980 celébrase la Fiesta Gastronómica «La so Excelencia la Fabada», un homenaxe a esti platu y a la cultura asturiana.
La llectura del pregón ye unu de los momentos que concita más espectación, cuidao que davezu la so llectura cuerre al cargu de xuna personalidá – yá sía d’ámbitu local, rexonal o nacional -, venceyada a distintos ámbitos de la cultura y la conocencia. Y amás, como colofón, esti actu ta amenizáu per una banda de gaites y un coru.
Pela so parte, nel intre del actu del pregón fai entrega del premiu del Concursu Internacional de Fotografía «La mina y el mar», y los visitantes pueden esfrutar cola esposición de les obres más destacaes d’esti concursu. Una esposición que dempués se fai itinerante por distintes localidáes d’Asturies.
Coles mesmes, hai degustación de fabada mientres tolos díes de la fiesta nos restoranes de La Felguera (Llangréu). Y de xacíu, otru motivu d’atracción festiva ye’l concursu de fabada. Ye induldable que, amás del gran ambiente festivo-gastronómicu que se da en La Felguera, la singularidá d’esta celebración tien tamién la so razón de ser nel productu: les fabes son eminentemente asturianes, y unu de los principales emblemes culinarios d’Asturies.
Fiesta de los Pimientos Rellenos. 8 d’avientu en Blimea (Samartín del Rei Aurelio). La localidá de Blimea acueye l’únicu certame gastronómicu dedicáu a los pimientos n’Asturies – la fiesta de los Pimientos Rellenos – de gran tradición na zona y con más de cuatro décades d’antigüedá. Esta fiesta entronca cola cultura tradicional de la cuenca minera, que cultiva l’arte culinario y xúnelo cola esaltación de l’amistá en redol a la mesa.
Amás de les manifestaciones gastronómiques, que son la esencia de la fiesta, esiste un ampliu programa d’actos culturales. La celebración dura dellos díes (siendo’l día grande’l 8 d’avientu), nel intre de los cualos preséntase’l Pregón de los Pimientos Rellenos, cola entrega del Pimientu d’Oru. Coles mesmes hai talleres infantiles, gaites, conciertos, sesión vermú, concursu de pimientos, mercadín navidiegu, teatru, etc.
