- Fonte: Ser Asturianu /
Fai non tantu les tradiciones yeren un importante elementu d’identidá, de refuerzu d’una comunidá de normal agrícola. Y ye que la nuesa sociedá entá nun tien los dos pies fora d’esi mundu llabrador, un mundu marcáu pol ritmu de les estaciones.
Asina, sabemos que los gaélicos (irlandeses) conmemoraben, tres la collecha, el Samain (lliteralmente, el «final del branu»). Y anque se presupon qu’otros pueblos célticos cuntaben con festividaes similares, nun hai documentación bien estensa al respeutu. Per otru llau, Manuel P. Villatoro señala que los romanos, tamién un pueblu indoeuropéu, honraben esi día a la diosa Pomona, la deidá de la seronda y de les mazanes.
Col Papa Gregorio III vieno la cristianización, treslladando la festividá de los «Mártires Cristianos» (Tolos Santos) al 1 de payares, pa faela coincidir cola fiesta pagana. Esto ye, «All Hallow’s Eve», embrivida como Halloween, sería la traducción al inglés de lo que nós llamamos «víspora de Tolos Santos», xuna celebración cristiana chiscada de tradiciones d’orixe paganu más o menos similares en toa Europa.
La cosa nun quedaría nun simple anglicismu si nun fora porque la festividá que lliteralmente se nos viende nun ye sinón un remake comercial frutu del cine y el marketing, alloñáu de les tradiciones d’el Oíche Shamhna o Halloween llevaes a Norteamérica polos emigrantes irlandeses.
Si Halloween vieno pa quedase, aprovechar el so tirón podría ser xuna oportunidá pa reinterpretarlo en clave asturiana, y recuperar asina xuna parte d’una parte del nuesu patrimoniu güei cercanu a la desapaición. Equí traémoste dellos mitos y tradiciones asturianes de la Nueche d’Ánimes o la viéspera de Tolos Santos recoyíes pol etnógrafu Alberto Álvarez Peña.
Banduxu
1. L’AMAGÜESTU DE DIFUNTOS
Una de les costumes más enraigonaes consistía en faer amagüestos, una xunta que, magar se repitía lo llargo de la seronda y l’iviernu, la solemnidá del víspora de Tolos Santos obligaba dexar un puñáu de castañes so un tapín de yerba, para aselar la fame de los difuntos. Nesti sentíu, si restallaba dalguna castaña, significaba qu’una ánima consiguiera salir del purgatoriu. La tradición de dexar comida o agua na puerta de les cases y los campusantos tuvo continuación hasta la década de 1940, al igual que la celebración de llacuaes sobro les tumbes de los antepasaos, tal que sigue faciéndose güei en México mientres el Día de Muertos. Falamos de rituales, sicasí, tan antiguos y estendíos como escorríos, yá dende tiempos d’Alfonso X «el sabiu».
2. AFURACAR CALABACES
El costume de vaciar calabaces (nabos, muncho primero que la hortoliza americana) ta llargamente rexistrada en tol norte d’España hasta la segunda metá del sieglu XX. La xera correspondía a los neños, quien asitiaben esti calabazón allumáu con veles nes puertes y ventanes o nes encruciades de caminos, onde se supon que s’apaecen les ánimes.
3. LA GÜESTIA
Por aquellos llares podía unu atopase fácilmente colos espíritos, pos mientres la Nueche d’Ánimes la frontera ente’l mundu de los vivos y de los muertos se desdibuxaba per unes hores. El peor infortuniu pal caminante yera atopase cola Güestia, xuna «hueste» o procesión d’almes en pena. Nada de lo que los muertos ufiertaren podía aceptase, pos ello traía convertise tamién en difuntu y analayar con ellos por tola eternidá. Otramiente, tampoco convenía contrariarlos. Si convidaban a comida lo meyor yera asemeyar que se mazcaba, de lo contrario nun habría sal de frutes capaz d’aselar tan fatal destín.
4. LA MAR QUE DEVUELVE A LOS MUERTOS
En dellos pueblos pesqueros, como en Cuideiru, non podía salise a afaenar. Los pixuetos preferíen arriar les veles y quedar en tierra esa nueche énte la medrana de que al recoyer les redes éstes salieren apinaes de los güesos d’aquellos marineros qu’habíen perecíu afogaos. Anque nun yera l’únicu peligru col que podíen atopase:
«Antiguamente los pescadores de Cudillero no salían a la mar la noche de todos los Santos ni la del día de la Encarnación. Pero una vez, la noche de todos los Santos, salieron dos lanchas a la pesca y al pasar frente a la concha de Artedo, vieron que, sobre el agua, casi a orilla de tierra, ardían muchas luces. Los marineros enfilaron las proas de sus lanchas hacia aquellas luminarias y rema que rema, porque allí las olas rompían con mucha fuerza, llegaron allá y vieron llenos de miedo, que las luces eran producidas por huesos que había puesto allí la Güestia».
(Aurelio del Llano, Del folckore asturiano, 1977)
5. L’AGUINALDU
Neños pidiendo l’aguinaldu en Robléu (Cerecea, Piloña). Añu 1930.Nada d’ese fusilable «trucu o tratu». Los dulces había que gana-y los, como n’Antroxu, polo que los chavales salíen coles cares embadurnadas de ceniza -ensin amarutase- a pidir cantando poles cases, onde’l pagu solía consistir en chorizu, llonganiza, castañes o ablanes. Y si había suerte, dalgún frixuelu (el terror de Pablo Casado).
«Queden con Dios señores
Nosotros con Dios nos vamos
Hasta l’añu venideru
Qu’en so casa mos veamos»
Por el contrario, si no recibían nada:
«Allá arriba n’aquel altu
Hai un perru cagando
Pa los amos d’esta casa
Que nun me dan aguinaldu.»
