IXUXÚ ツ Isa

Vamos amanecer con cielos pocu nublos salvu na mariña y na zona central del interior onde van empezar el día con nubes de tipu baxu. Col intre de la mañana estes nubes baxes van sumir polo que se van abrir claros anque podríen predominar les nubes de tipu altu. Pela tarde la nubosidá va estendese por tola rexón y nun se refuguen bastios que van activar l’avisu mariellu nel suroccidente, nel cordal y, inclusive, na mariña oriental. Por ello, a partir de les 16 hores y hasta el final del día, l’Axencia Estatal de Meteoroloxía va activar dichu avisu por nubes que podríen venir acompañaes de xarazo y, amás, pola posibilidá de rexistrar hasta 15 llitros per metro cuadráu nuna hora. Les temperatures máximes van baxar de forma xeneralizada ente 2 y 3 ºC al respective de les del xueves y les mínimes apenes van variar.

El sábadu preve tiempu estable pela mañana con intervalos nublos anque con enclín a abrise grandes claros dende’l norte del Principáu. Pela tarde nun se refuga que puedan volvese a desenvolver nubes d’evolución con posibles bastios vespertinos nel cordal. Les temperatures van xubir llixeramente.

Esperamos cielos pocu nublos o estenos prácticamente mientres tol día. A lo sumo, podríen presentase delles gurrianes mañaneres de forma local que rápido van sumir para dar pasu a una xornada soleyera en tolos rincones d’Asturies. Les temperatures máximes van xubir de forma xeneralizada pero facelo sobremanera nel cordal (hasta 4 o 5 ºC más) y restu del interior (hasta 3 ºC más). Na mariña l’ascensu va ser más llixeru. Les mínimes van xubir nel cordal y van caltenese ensin grandes cambeos nel restu. Per otru llau, hai que destacar les raches de vientu que podrán producise especialmente na mariña. Van ser raches de nordeste moderaes que podríen superar los 40 km/h.

Sigue leyendo «El tiempu (El Comercio)» →

Vamos amanecer con cielos pocu nublos nel sur de la rexón y tamién nel interior occidental. Nel restu, espérense dellos intervalos de nubes baxes ensin importancia. A lo llargo de la mañana (sobremanera a partir del mediudía) les nubes van sumir por completu polo que la tarde va presentase asoleyada en tol Principáu d’Asturies prácticamente ensin esceición. Los vientos van predominar de nordeste siendo fluexos nel interior pero con raches moderaes que podríen superar los 40 km/h na mariña. Les temperatures máximes van xubir hasta 5 ºC nel cordal, hasta 3 o 4 ºC nel restu del interior y de forma más llixera na mariña. Les mínimes, sicasí, van baxar en tol interior asturianu.

Sigue leyendo «El tiempu (El Comercio)» →

Los cielos van tar marcaos pola nubosidá en tol Principáu d’Asturies dende primer hasta última hora. Estes nubes van dexar precipitaciones débiles pero xeneralizaes que van ser más frecuentes pela mañana y primeres hores de la tarde. Asina tou, escontra’l sur de la rexón ye probable que sigan siendo persistentes tamién a lo llargo de la tarde. Los vientos van soplar de componente norte con delles raches moderaes especialmente na mariña. Les temperatures máximes van baxar hasta 5 ºC na metá sur, y hasta 4 ºC nel norte, salvo na mariña onde van baxar hasta 3 ºC respectu al domingu. Les mínimes van baxar llixeramente nel interior y van caltenese ensin cambeos na mariña.

Sigue leyendo «El tiempu (El Comercio)» →

Vamos amanecer el domingu con nubosidá de tipu baxu que rápido va dir sumiendo para dar pasu a un mayor protagonismu del sol que va rellumar en prácticamente tol Principáu a mediudía. Pero, a lo llargo de la tarde, vamos dir reparando como van dir entrando nubes pol noroeste que se van dir estendiendo por tola rexón. Ello ye que nun se refuga que pueda escapase dalgún orbayu a la fin de la tarde o, siquier, pela nueche. Los vientos van predominar de noroeste-oeste con raches moderaes na mariña mientres casi tol día, y fluexos nel interior sacantes pela tarde cuando tamién podríen dase delles raches daqué más significatives. Tocantes a les temperatures, les máximes van ser bien similares salvo n’altes zones de monte onde podríen baxar llixeramente. Les mínimes nun van variar salvu de forma local en zones del interior onde van baxar, a lo sumo, 1 ºC respectu al sábadu.

Sigue leyendo «El tiempu (El Comercio)» →

Esperamos cielos bien nublos polo xeneral con posibilidá de delles precipitaciones débiles. A lo llargo de la tarde prevese que les nubes sían cada vez menos compactes y puedan dise abriendo claros nel cielu, sobremanera na mariña y zones de la metá norte asturiana. La probabilidá d’agües pela tarde va ser más baxa, pero asina tou nun se refuga qu’entá puedan escapase dellos bastios nel cordal. Tocantes a les temperatures, les máximes van xubir de forma xeneralizada. Esta xubida va ser muncho más significativa cuanto más movamos escontra’l sur de la rexón. Nel cordal van xubir hasta 6 ºC, nel restu del interior hasta 4 o 5 ºC, y na mariña y zones próximes hasta 2 o 3 ºC. Les mínimes van xubir llixeramente en puntos del interior occidental y nel sur d’Asturies, calteniéndose ensin cambeos nel restu.

Sigue leyendo «El tiempu (El Comercio)» →

El miércoles va ser un día que, no meteorolóxico, nada va tener que ver colo vivío va unos díes cuando se superaben en demasía los 30 ºC na mayoría de poblaciones asturianes. Vamos tener cielos bien nublos o cubiertos de norte a sur y d’este a oeste mientres tola xornada. Esta nubosidad, amás, va dexar precipitaciones xeneralizaes que, anque van poder tar presentes mientres tol día, van ser más frecuentes pela mañana y n’hores centrales. Los vientos van predominar de norte tendiendo a nordeste col intre de les hores. Van ser vientos fluexos pero con delles raches moderaes sobremanera na mariña. Les temperatures van baxar de forma estraordinaria nel cordal (hasta 8 o 9 ºC menos), de forma notable nel restu del interior (hasta 6 ºC) y de forma más llixera na mariña (hasta 2 o 3 ºC). Poro, va haber poblaciones que nun consigan algamar los 20 ºC, y les que los algamar, a dures penes van superar.

Sigue leyendo «El tiempu (El Comercio)» →