- Semeyes: Pablo Nosti / Fonte: El Comercio /Pablo A. Marín Estrada
L’axitador asturianu y la so banda fixeron tremecer d’allegría
les tables del Campoamor qu’esta tarde repite con tou vendíu.
La Romería’ empezó col artista travesando’l patiu de butaques para llegar al escenariu. Rodrigo Cuevas, l’axitador folklóricu más universal fixo ayeri tremecer les nobles tables del Teatru Campoamor cola fuerza imparable de la so ‘Romería’ nuna cita que güei va repitir y que confirma, con tol papel vendíu dende va meses, lo muncho que se-y quier na so ciudá natal.
Cueves, en madreñes y con gafes de sol, en plenu espectáculu col equipu de baille.
Qu’el cantante correspuende por igual al públicu uvieín con tol so corazón y el so arte, demostrolo mientres l’intensu espectáculu qu’ufiertó arropáu pel so solvente banda: los multinstrumentistas Mapi Quintana, Rubén Bada, Juanjo Díaz y Tinu Cuesta más el baille antroxador de Les Perfectes, cuatro talentos faciendo honor al so nome. Los otros integrantes de la folixa: el públicu que se dexó llevar nella dende la primer ocasión hasta la catarsis final.
El divo entró en loor d’aplausos pol patiu de butaques a los sones de l’asturiana ‘Baxando yo pa l’aldega’ y «viendo tanta xente guapo», añedió abanicu en mano pa dir directu al temazu ‘Más animal’. Coles palmes de la xente caldiándolo y los coros, «vamos facer una romería que se va a cagar la perra», avisó por si había duldes. Y collechó otra ovación al esclamar «¡Qué guay tocar en casa, cagonrós!», con punzada: «Anque igual nos hackeen los turcos». Por suerte, nun hubo troleo y diríen sonando ‘Allá arribita’ y una chorniza ‘Arbolea bien plantada’ precedida d’estriptis. Tuvo un detallazu al salir a buscar a dos arrezagaos que quedaron fora pol atascu navidiegu: «Ponen tantes lluces que la xente pégase como -yos polilles». Y dio depués pasu de nuevu a la llocura con ‘Casares’ y al tronío compartíu con ‘El día que nací yo’, antes de convidar a baillar el super hit ‘Cómo ye’ y a «romper los meniscos» col Xiringüelu’.
Más xordia col potente ‘Veleno’. «Va Haber que dir retirando», apuntó con poco convencimientu’l de Vegarrionda, quedándose desnudu a pechu llobu pa dar vuelu colos baillarinos a otru gran cantar, ‘Matinada’.
«¡Qué guay tocar en casa! Anque igual nos hackeen los turcos», bromió l’artista que foi ovacionáu en cada cantar
«¿Queréis otra?», preguntó. A la respuesta masiva de «¡Otres trés!» arrincó con ‘Rambal’, con tola so delicadeza a flor de piel y collechando una atronadora ovación del teatru de pies. Entá había más. La muñeira ‘Filla da bruxa’ fixo tremecer de nuevu al Campoamor enteru. Y como brillosu colofón desamarróse la catarsis con ‘Romería’ y l’emocionáu «¡Muches gracies Uviéu!» del artista nel so mueyu. Na so casa. Pa dicir adiós con guasa, salieron a baillar ‘La rapaza turca’ n’alcordanza de los supuestos hackers.
