El Mundo / La llegada d’un tiburón foca a una sablera d’Asturies xenera una gran espectación científica. Estos tiburones, que pueden algamar hasta los 4.000 metros de fondura, son ovovivíparos, esto ye, producen güevos, pero estos permanecen dientro del cuerpu de la madre hasta que l’embrión ta totalmente desenvueltu.
Un exemplar de tiburón foca (Centroscymnus coelolepis) de 1,45 metros de llargor y 18 quilos de pesu foi atopáu varáu na sablera de L.luarca, posiblemente debíu al debilitamientu de fuerces que-y produció un anzuelu del que llogró safase pero que-y fixo perder l’aldu.
El director de la Coordinadora para l’Estudiu y Protección de les Especies Marines (Cepesma), Luis Laria, esplicó esti xueves a EFE que l’afayu causó un gran impactu na comunidá científica porque esta especie ye bastante desconocida al atopase davezu a grandes fondures.
L’espertu naturalista aseguró que l’afayu xeneró un gran interés científicu en distintos países énte la necropsia practicada, amás de l’atención mediática pol aspeutu físicu d’esta especie.
Estos tiburones, que pueden algamar hasta los 4.000 metros de fondura, son ovovivíparos, esto ye, producen güevos, pero estos permanecen dientro del cuerpu de la madre hasta que l’embrión ta *totalmente desenvueltu.
Los güevos eclosionan dientro del senu maternu y queden como fetos nel so interior hasta qu’algamen un tamañu apropiáu pa la so espulsión y poder tener una vida independiente nel so hábitat marín.
L’equipu que practicó la necropsia, del que formó parte Luis Laria, topó dolce güevos de siete centímetros de diámetru cada unu: «Daqué espectacular porque son, digamos, embriones en formación, que fueren vidables».
La necropsia practicada tres l’afayu del exemplar en L.luarca.
L’exemplar, topáu la selmana pasada, nun presentaba nengún tipu d’anomalía qu’ayudara a establecer les causes del varáu, pero la necropsia dio cola clave n’una rasgadura sangrante que fixo pensar que se trató d’un anzuelu del que se punxo safar, anque ensin evitar qu’ello-y xenerara una hemorraxa que la foi debilitando hasta produci-y la muerte al llegar a la sablera.
Vive a gran fondura Estos exemplares, poco conocíos, viven a delles milles de la mariña y suelen tar a fondures d’ente 400 y 1.600 metros. Cuando tán en procesu de xestación, esa fondura ye menor, d’unos 400 metros, pa garantizar l’ésitu de la crianza buscando la idoneidá medioambiental, alloñada de les presiones abisales.
Esti animal de cuerpu robustu y color escuru vive na escuridá total del océanu y ye capaz de posase no fondero y permanecer ende muncho tiempu de la so vida, y pallo, como se comprobó na necropsia, tien l’abdome planu.
Laria esplicó que nun precisen faer nengún esfuerzu respiratoriu, como cualesquier otru tiburón si se posara nel llechu marín, gracies a unos espiráculos que tienen na cabeza por onde absuerben l’agua pa pasala a les branquies, polo que nun precisen tar cola boca abierta.
L’exemplar, de 1,45 metros de llargor -unos 15 centímetros más de la media conocida- y 18 quilos de pesu, tien un fégadu que supon el 27,8% del total del pesu del cuerpu.
Una vegada sometíu al procesu de caltenimientu, l’exemplar va ser esibíu, al pie de el so fégadu y los güevos, nel Parque de la Vida que dirixe Luis Laria en L.luarca.
