La imaxe del Salvador de la Catedral d’Uviéu repon los sos colores góticos y les sos lletres n’árabe. La eliminación de los repintes de la imaxe dexa afayar decoraciones vexetales y grabaos flamencos na talla, que recupera la cruz del orbe.
Antón García, Jesús Pures y Otilia Requejo,
énte la restaurada imaxe del Señor de la Catedral. | MIKI LÓPEZ
La túnica recuperó’l so azul orixinal y la so sutil decoración con fueyes d’hiedra, el mantu vuelve ser coloráu, l’orbe ta presidíu de nuevu pola cruz y pueden apreciase los grabaos d’orixe flamencu y les lletres n’árabe. Estos son dalgunos de les resultancies de la restauración que sufrió la imaxe del Salvador; aquella que tienen de visitar tolos pelegrinos antes d’empecipiar el Camín Primitivu y que s’alluga a la derecha del presbiteriu. Agora tamién puede dicise daqué más sobre’l so orixe: «Ye una escultura trecentista, d’ente’l sieglu XIV y el sieglu siguiente, y ta venceyada a les primeres estructures de la fábrica gótica».
Mañana va celebrase la fiesta de la Tresfiguración del Señor y l’imaxe va arrodiase de lloréu, anque l’allugamientu va ser distinta pa nun estropiar los trabayos fechos polos restauradores Chus Pures y Emilia Fernández.
Dambos intervinieron na imaxe mientres unos dos meses pa devolvela a los sos oríxenes gracies a la inversión fecha pol Cabildru col dineru recaldáu de les entraes de los visitantes a la «Sancta Ovetensis». Nesti tiempu los espertos esaniciaron los repintes «porque, prácticamente, tanto’l soporte pedrés como tola base de la policromía tán en bon estáu», según sorrayó Pures mientres la presentación de los trabayos nun actu que tuvo llugar nel mediudía d’ayeri na Catedral cola presencia del deán, Benito Gallego, y el xeneral d’Acción Cultural y Normalización Llingüística, Antón García.
Pures foi esbillando detalle per detalle. La eliminación del repinte de la primer metá del sieglu XIX dexó recuperar l’azul orixinal de la túnica y esaniciar el colloráu que s’añedió dempués. Un pasu que dexó afayar una «decoración bien sutil de fueyes d’hiedra que tienen un calter bien marcáu, el de la resurrección y l’eternidá divina». «Son elementos bien simbólicos nel góticu». Tamién s’afayó que’l viesu de la tela ye naranxa. «Nun lo fixeron porque sí; ye un color que destaca enforma porque, amás, la teoría del color nesi momentu nun esistía, pero sabíen qué colores destacaben».
VER LNE / Pela so parte, el colloráu del mantu ye sulfuru de mercuriu y otra de les grandes novedaes ye qu’el orbe nun yera como se ve na actualidá. «Tenía un color malaquita o azulita qu’asonsañaba la tresparencia. Esto ye, el color qu’ellos interpretaben como’l cosmos». De forma paralela, recuperó la so cruz.
Tamién consta la imaxe d’una serie de grabaos que fueron despintaos colos repintes y, agora, recuperáronse, pero son «difíciles de ver porque tán escurecíos y bien deterioraos». «Son brocados aplicaos; esta ye una técnica bien esquisita d’orixe flamencu y datense ente’l segundu terciu del sieglu XIV y el segundu terciu del sieglu siguiente», esplicó Pures. Sicasí, utilizaron cera de resina que perdura bien poco nel tiempu.
