El tiburón foca que llegó a la mariña de L.luarca yera una madre embarazada. La necropsia de la criatura amosó que tenía 12 güevos de gran tamañu, cada unu con un embrión nel so interior. National Geographic /
L’exemplar del tiburón foca (Centroscymnus coelolepis) atopáu nes mariñes de L.luarca midía 145 cm y pesaba 18 kg. Equí puede vese sobro la mesa del llaboratoriu antes de la necropsia.
A finales de la selmana pasada les mariñes de L.luarca (Asturies) amanecíen con un visitante inesperáu. Les foles abasnaron hasta la vera’l cuerpu d’un exemplar de tiburón foca (Centroscymnus coelolepises), un animal que de normal s’atopa nes fondures oceániques. Según esplícanos Luis Laria, quien estudió al exemplar, nuna entrevista telefónica pa National Geographic España, topáronse exemplares d’esta mesma especie a más de 3500 metros de fondura. Luis Laria ye’l fundador y presidente de l’asociación CEPESMA (Coordinadora pal estudiu y protección de les especies marines).
Tres l’afayu, Luis recoyó al exemplar pa estudiar les causes de la so muerte y varamiento. Al realizar la necropsia la sorpresa foi mayúscula, yá que nel interior del animal toparon 12 güevos de siquier 7 centímetros de diámetru con pequenos embriones de tiburón nel so interior. Según rellátanos el mesmu Luis: “teníamos barruntos de que se trataba d’una fema embarazada, pero nunca atopáramos con un exemplar asina”.
“Estos tiburones yeren muncho más comunes fai más de 50 años, pero debíu al interés comercial pol so fégadu, que puede llegar a ocupar gran parte del animal, los sos númberos menguaron”. Por ello, el varamiento d’esti exemplar supon una rareza que puede ayudar a entender dende diversos datos de la so fisioloxía hasta la so distribución actual y les amenaces a les que s’enfrenta nel so hábitat.
Afondando na vida del tiburón foca Esti tiburón, tamién denomináu tiburón pailona, ostentaba hasta apocayá’l récord del mundu por ser l’elasmobranquiu topáu a más fondura (3675 metros). Créese qu’esti tiburón pasa parte del so tiempu reposando no fondero marín gracies a unes adaptaciones singulares del so cuerpu. “Como podemos reparar, la especie tien dos furacos denominaos espiráculos na parte cimera que lleven l’agua hasta les branquies. D’esta miente, puede alendar ensin tener qu’abrir la boca” esplica Luis.
Al nun tener que dar bocanaes, el tiburón nun ximielga los llimos o sables del fondu marín y puede folgar tranquilamente. “L’animal tamién tien un banduyu planu, lo que refuerza esta idea” apunta Luis.
El güeyu del tiburón foca ta afechu para les grandes fondures del océanu,
onde la lluz arralez. L’espiráculo ye’l furacu que se ve a la izquierda de la imaxe.
L’exemplar topáu na mariña de L.luarca midía 145 cm, pesaba 18 kg y nun amosaba signos de daños esternos, polo que la causa de la so muerte nun yera aparente. Asina, Luis Laria, al pie de Susana Echevarría y Miguel Fernández decidieron realizar la necropsia del animal para ver si podíen desentrañar porqué esti exemplar acabara varáu nes mariñes asturianes.
En cortando l’aspra piel del animal, que Luis definió “como un papel de lixa” al aportar al cuévanu toparon 12 güevos d’alredor de 7 centímetros de diámetru cada unu. Esto ye, cada unu de los güevos tenía un tamañu equivalente a una pelota de tenis.
Amás, tamién toparon otros 9 güevos que nun se desenvolvieron dafechu, del tamañu de banzones. En total, el conxuntu de güevos pesaba alredor de 2 kg, más de la décima parte del pesu total del animal.
Primer planu d’unu de los güevos topaos nel interior del tiburón foca.
Puede apreciase el so gran tamañu.
Topar una fema nesti estáu ye bien infrecuente porque la especie reproduzse por aciu güevos, pero al igual qu’asocede n’otros tiburones, pare críes vives porque los güevos eclosionan nel interior de la madre tiburón.
Lamentablemente, estos güevos nun tuvieren ocasión d’eclosionar, y nel interior cada unu de los 12 güevos atopó un embrión fináu d’ente 1 y 2 cm.
Cómo morrió’l tiburón de les mariñes asturianes. Al rematar la necropsia completa del animal y esaminar a xeitu el so sistema dixestivu, los miembros del centru toparon un corte nel esófagu del tiburón. “Teníamos barruntos de qu’asocedía daqué nel so sistema dixestivu porque había restos de sangre na so boca y nel so estómagu”, esplícanos Luis. Y la corte dio-yos la pista necesaria pa reconstruyir los últimos minutos de la vida del animal.
“Les feríes coinciden coles que se produciríen mientres xuna captura accidental. Por ello, el nuesu diagnósticu definitivu ye que l’exemplar tragó un anzuelu, posiblemente de pesca de palangre y, al notar l’emburrión revolvióse violentamente y llogró safase. Sicasí, al salir, l’anzuelu resgó de 3,5 cm del so esófagu y la consecuente hemorraxa debilitó al animal hasta que varó y finó”, esplícanos Luis.
Esti fechu casual dexa estudiar una especie poco común, pero que la so población menguó considerablemente consecuencia de la pesca desatamañada. La razón, como esplicábamos de primeres del artículu, yera la d’estrayer el fégadu pal so consumu, yá que se trata d’una fonte d’ácidos grasos saludables pa los humanos. Nesti exemplar, que recordemos foi pesáu en 18 kg, el fégadu pesaba 5 kg, esto ye, casi la tercer parte. Na actualidá, esta especie de tiburón yá nun se pesca con fines comerciales, pero dende CEPESMA aportunen na necesidá de siguir estudiando y entendiendo como les acciones humanes afecten a los ecosistemes marinos.
