Topen na cueva de Tito Bustillo la flauta paleolítica más antigua d’Asturies. El preséu, ellaboráu con un güesu d’ave, foi atopáu por un equipu de la Universidá de Salamanca al pie de otres pieces que se tán analizando.
La pintura nun yera l’únicu arte que conocíen, almiraben y practicaben los humanos prehistóricos, tamién conocíen la música, y de xuru la danza, el baille. Unu de los últimos descubrimientos realizaos na cueva de Bustillo, en Ribesella, asina lo paez acotalo. Un equipu de la Universidá de Salamanca, que realiza escavaciones dende 2020 nel covarón riosellana, topó, xuntu con otra pieces, lo que los espertos abarrunten que podría ser una flauta o un xiblatu del Paleolíticu cimeru (de 35.000 a 10.000 años antes del presente). De confirmase l’afayu, sería la segunda flauta prehistórica atopada n’Asturies y, previsiblemente, la más antigua.
El preséu, abondo deterioráu, ta ellaboráu con un güesu d’ave d’una especie entá por determinar. Tanto’l Gobiernu del Principáu como los responsables del Muséu Arqueolóxicu d’Asturies tán al corriente del descubrimientu y aguarden les resultancies de la investigación, qu’entá podríen tardar, cuidao que los espertos tienen hasta cinco años p’analizar y restaurar los afayos antes d’apurrilos. La llei prohibe que les pieces salgan d’Asturies.
«Nel intre de la última campaña d’investigaciones arqueolóxiques autorizada pola Conseyería de Cultura, Política Llingüística y Deporte na cueva de Tito Bustillo, en Ribeseya, topáronse dellos materiales de potencial interés que tán siendo, nestos momentos, oxetu de los correspondientes estudios y analítiques per parte del equipu investigador, nel marcu de l’autorización que tienen concedida pa tal fin. Ye por ello prematuru realizar agora una valoración del interés d’eses pieces, de la so antigüedá o función orixinal», señalaron ayeri fontes del departamentu qu’encabeza Vanessa Gutiérrez.
Hai un precedente: nos años noventa del sieglu pasáu topóse una flauta prehistórica na cueva de La Güelga, nel conceyu de Cangues d’Onís. Aquel preséu foi datáu nun momentu tardíu del Magdaleniense inferior, col que termina’l Paleolíticu cimeru, depués podría tener unos 10.000 años. Apaeció rota en sentíu llonxitudinal n’ensame de fragmentos, y solo foi reconocible tres una minuciosa restauración realizada por Antonio del Rei. Ta decorada con fondes incisiones rítmiques llineales.
