«Decidí caleyar estos estilos porque ser artista
ye como montar en bici:
si nun te mueves, pierdes l’equilibriu»
Va xusto una selmana Héctor Braga asoleyaba en toles plataformes dixitales y en CD Rabil, l’octavu trabayu d’una estensa carrera en solitario na que tien caleyáu pel folk, la música tradicional, la canción d’autor y l’asturianada.
Nesta obra compila diez temes qu’amuesen el so so soníu más celta; too ello con un montonera collaboraciones (Víctor Manuel, Hevia, Algaire, Baxel, Deira, Joaquín Díaz, Luis Delgado, Óscar Ibáñez, Bango, amás de les bandes de gaites Picos d’Europa, LaKadarma y la berciana Castro Bérgidum) y la producción de Javier Blanco (Mägo de Oz, Sôber).
Ye un trabayu que tien un claro componente colectivu y na qu’el multiinstrumentista trabayó a lo llargo de dellos años cuidando aspectos que van acullá de lo puramente musical. Conocedor fondu de la cultura asturiana -ya tamién Doctor en Musicoloxía y ganador del Premiu Máximu Fuertes Acevedo d’Ensayu con una obra dedicada a l’asturianada-, aprovechamos esti llanzamientu pa falar de la so carrera, d’esti discu y de la situación de la cultura’l país y la música asturiana.
La primer entruga ye casique obligada. ¿Qué ye pa ti la gaita rabil?
Ye un cachu importante del mio alma, una compañera inseparable que conocí mientres el trabayu de campu pel rural d’Asturies, nos años 90. Los paisanos y paisanes falaben d’ella con señaldá, del repertoriu del tíu Agustín, de Luciano Andrés o de Manolín de Barredos. Ehí entamó too. Yo siento la gaita de rabil como canto nel tema onde collabora Algaire: “lo guapo de vivir y les coses importantes son con gaita de rabil”.
«Nesti discu entamo la xera d’andoliar, musicalmente, otru tarrén. Rabil amuesa un momentu tan importante como ye’l d’abrir el corazón al mundu ensin dexar de tener los güeyos na cultura del mio país»
En rellación a esto, ¿por qué decidisti da-y el protagonismu a esti instrumentu nesti discu?
Ye too un procesu vital. Inda que ye’l mio instrumentu principal, na mio discografía hai otros instrumentos, otros repertorios y otres estayes dedicaes a la música de nueso. A la recuperación etnográfica, que ye lo que daveres más m’interesó. Poro, inda que na escena tradicional movíme como pexe nel agua en conciertos cuasique diarios, agora fice un cambéu de pexe p’anfibiu. Nesti discu entamo la xera d’andoliar, musicalmente, otru tarrén. Rabil amuesa un momentu tan importante como ye’l d’abrir el corazón al mundu ensin dexar de tener los güeyos na cultura del mio país.
«Na tranquilidá del mio estudio de grabación sorprendíme a mí mesmu componiendo muncha música nueva y toa yera, como digo, cola gaita de rabil»
Pasaron seis años dende’l to anterior llarga duración, Fundamentos de l’Asturianada, polo que Rabil foi cocinándose a fueu llentu. ¿Cómo foi’l procesu de creación d’esti trabayu?
El procesu tardó n’entamar porque Fundamentos dexóme mui cansáu. Foi una xera escomanada de siete meses grabando, moviendo la mio tesitura vocal pa cantar 75 asturianaes de tolos estilos a pelu y con ocho gaiteros y dos pianistes… Punxe-y el ramu a una época y a un trabayu desaxeráu, tamién nel campu académicu, alredor de l’asturianada. Amás, xusto enantes de la pandemia viví una retafila de cambeos personales y llaborales mui radicales, magar que toos pa bien. El casu ye que na tranquilidá del mio estudio de grabación sorprendíme a mí mesmu componiendo muncha música nueva y toa yera, como digo, cola gaita de rabil.
N’Asturies tenemos la suerte de vivir nun llugar enllenu de tradiciones, con una bayura musical y una rica mitoloxía qu’andolien la maxa y el misteriu, que faen esnalar la imaxinación al traviés de temátiques universales y atemporales. Tolos cantares tienen una base lliteraria y narrativa importante, como la propia tradición de los rabileros, y los protagonistes son xanes, cuélebres y guaḥes llobatos, en temes como ‘Tres Besos’, ‘El Penitente’ o ‘Llobatu’. Tamién quixi tocar la historia recién, en cantares como ‘Valiente’, onde falo de la Guerra Civil y la so épica mientes que los chisgos a la tradición tan en ‘Roubiltones’ y ‘Rabil’. Tol repertoriu amiesta elementos tradicionales con argumentos históricos, máxicos y, davezu, instrumentaciones escures o lluminoses, según el cantar.
Tamién ye importante solliñar que tolos temes cantaos son dafechu n’asturianu. Asina lo faen comigo Víctor Manuel, Algaire o Joaquín Díaz, de la Fundación d’Urueña. Alredor de les melodíes, háiles mui virtuoses y desixentes, davezu con con efeutos lletrónicos y momentos cimeros de dificultá téunica y espresiva mui nuevos na tradición d’esti instrumentu. Rabil ye un trabayu reondu de principiu a fin y toi arguyosu del resultáu. Ta fechu a conciencia, como te digo, mientres cuasique cuatro años de trabayu posáu y fechu con precuru.
«Facer coses nueves y orixinales había de ser lo normal al marxe de más o menos reinterpretación d’otros estándares»
Una de les novedaes más bultables ye l’apuesta por un soníu que nun teníes cuasi transitáu hasta agora. Esti discu ye’l más folk, el más celta, el más electrónicu y rockeru de la to carrera. ¿Por qué decidisti caleyar per estos estilos?
Después de tanta dedicación al folclor, esti cambiu de rexistru quería facelu bien claru, y renovar los direutos pa ufiertar un nuevu formatu ambiciosu y de primer nivel. Hai quien diz que los mios conciertos son esperiencies culturales de primer orde, chutes d’amor pola música, la llibertá y la diversidá onde la xente canta, bailla y hasta ve imáxenes d’intelixencia artifical mientres tocamos. Decidí caleyar estos estilos porque ser artista ye como montar en bici: si nun te mueves, pierdes l’equilibriu. Mesmo que los cocineros, los artistes tenemos que saber cocinar munchos platos amás de les especialidaes. Facer coses nueves y orixinales había de ser lo normal al marxe de más o menos reinterpretación d’otros estándares.
La figura de Javier Blanco, productor de Mägo de Oz y Sôber (ente otres bandes) camiento que tien muncho que ver nesto último. ¿Cómo surdió esta collaboración con él, cuánto d’él hai en Rabil y de qué manera?
Javier puxó enforma pa empobiname per esta llinia. Elli tien trabayao pa xente de primera división como Mägo de Oz, Sôber y otros artistes como Ana Belén o Driss El Maloumi. Dio comigo de casualidá buscando n’interné instrumentos “raros” pa les sos composiciones sinfóniques. Ello fue que, tres llargos alderiques previos (pasamos hores falando per teléfono mientres la pandemia), coneutamos dafechu y non namás nel tarrén musical, sinon que tamién nel filosóficu y na ética profesional. Apautamos trabayar a comuña y ficimos un equipu: yo diba enfotame más en componer y orquestar mientres qu’elli fadría igües, produciendo’l material. Tanto-y gusta’l proyeutu qu’incorporóse a los direutos, y esto nun ye habitual, porque les producciones d’otros artistes suelen ser por encargu y ehí termina’l vínculu. Nel mio casu, en Javier Blanco gané un músicu pa la banda amás d’un bon collaciu que fai milenta aportaciones con un criterio artísticu fondu y precisu, y que siempres diz la verdá de lo que piensa. Anguaño eso nun tien preciu.
«Javier Blanco dio comigo de casualidá buscando n’interné instrumentos ‘raros’ pa les sos composiciones sinfóniques. Ello fue que, tres llargos alderiques previos coneutamos dafechu»
Les sonoridaes de calter celta tan bien presentes nel álbum y nún de los testos promocionales del trabayu faes una reivindicación de la música celta. ¿Ta habiendo un ‘revival’ de lo celta? Proyectos nuevos como Guieldu o Bango son firmes defensores d’esta etiqueta de la qu’otres formaciones de música tradicional renieguen.
De revival celta, nada. Esti ye’l momentu del baille y la pandereta, que por fin salieron del armariu de posguerra, ho (rises). Bromes aparte, mira, tanto Bango como Héctor Aneiros, alma máter de Guieldu, andechen nel discu. Y nun ye casualidá. Yo soi celtista simpatizante, no personal y sentimental, dende qu’a los 15 años lleí llibros sobro’l paganismu, les cultures prerromanes y sentí vinilos d’Alan Stivell, Beleño o d’aquel sellu Guimbarda que mos averó a folclores del mundu atlánticu. Pensar que’l celtismu ye namás que melodíes d’inspiración irlandesa col buzuki y el vigulín ye una simpleza. El celtismu ye muncho, munchísimo más qu’eso.
Nesti tiempu la ciencia dexó claru l’heriedu celta na cultura, na xenética, na llingüística o n’arqueoloxía d’Asturies, magar que terraplanistes nunca nun falten ¿eh? (rises).
Per otru llau, ye verdá que musicolóxicamente nun hai muncho que rascar alluendi dellos instrumentos como los que toca Abraham Cupeiro, pero comercialmente, la celta ye una etiqueta del s. XIX tan bona como cualisquier otra. Si hai música mediterránea, andalusí, exipcia, babilónica, metal viquingu y hasta rock góticu, ¿cómo nun va a haber música celta?
Ye curioso cuánto ofiende “lo celta” a dalgunos. La xente qu’arreniega del celtismu, o bien nun ye consciente de lo que diz, o bien ye que nun-y presta nada’l puxu y visibilidá internacional qu’ufre esta etiqueta a cultures minoritaries y les sos llingües, casu de l’asturiana. Sicasí, al marxe de lo musical y estético, lo más interesante pa mín y el verdaderu trasfondu de la militancia “celta” n’Asturies ye, como diz David Guardado, si queremos ser esa Asturies, cuna y madre d’España, qu’apigaza ensin facer nada por sigo mesma mientres otros la utilicen interesadamente, o si queremos una Asturies que sobreviva como comunidá específica, calteniendo la so identidá y viabilidá económica n’andecha coles cultures hermanes del atlánticu, los llamaos países celtes.
Mientres Noam Chomsky sopelexa qu’hai un propósitu en distorsionar la historia y facenos creyer que ye mesiánica y los grandes homes ficiéronlo too, los conocedores de la cultura común y colectiva, como los celtistes, somos xente sabedor de que na historia d’Asturies Pelayo nun falaba castellán, Xixón nun yera nin la mitá d’importante qu’Asturica Augusta nin un xenocida como Augusto diba merecer anguaño una estatua nesa ciudá.
«Ye curioso cuánto ofiende “lo celta” a dalgunos. La xente qu’arreniega del celtismu, o bien nun ye consciente de lo que diz, o bien ye que nun-y presta nada’l puxu y visibilidá internacional qu’ufre esta etiqueta a cultures minoritaries y les sos llingües, casu de l’asturiana»
Precisamente l’interceltismu tamién ta presente nel trabayu a traviés d’unes pieces d’orixe escocés y gallegu.
Caro, porque nel discu, mesmo que nos conciertos, manexo la gaita rabil como un preséu tresversal, tan bonu como cualisquier otru pa facer música instrumental nuestra o de los vecinos atlánticos, dende muñeires galleges a reels escoceses. Óscar Ibáñez ye un referente en Galicia y Deira son unos virtuosos qu’entamaron carrera nun concursu precisamente n’Escocia. Con músicos d’esi nivel da gustu facer interceltismu. Porque facemos música celta, ¿eh? (rises)
Pa esti discu manexé un criteriu d’escoyeta totalmente musical. Valoremos lo que-y vendría bien a cada tema ensin nomes preconcebíos. Dende’l tríu base que faigo con Javier Blanco y Simón San José garré’l pulsu a la escena d’artistes y grupos dispuestos a collaborar comigo. Quiero solliñar qu’amás de les bandes de gaites (Picos d’Europa, Noega, LaKadarma y Castro Bérgidum) y los collacios asturianos “de siempre”, les figures más consagraes, como Hevia o Víctor, fueron les primeres n’aceptar ensin condiciones. A la escontra, viendo’l cambéu que yera esti discu nel mio facer quixeron echame un gabitu pa dame la visibilidá, qu’a dicir d’ellos, yo merecía. Nun tengo más qu’agradecimientu al puxu y xenerosidá de toos ellos.
Esta colectividá nun ta presente namás na música, porque t’arrodiasti d’un equipu de persones pa desendolcar tolos llabores que van acuyá de la música: videoclips, diseñu, contratación d’una campaña de promoción… Nesti sen, ficisti un llanzamientu dende l’autoxestión pero cuidando dellos de los aspectos fundamentales qu’arrodien a un llanzamientu discográficu güei (singles, videoclips, newsletters, xubir canvas a spotify…). Prestaríame qu’afondares más nesto.
Caro, hai un llabor importante coles ilustraciones orixinales de Vítor González, les semeyes de Carlos Garna y la xera de María Ávila remocicando la web y la tienda online. Amás fice una gran inversión (ensin subvenciones nin crowfundings) nos videoclips. ‘Llobatu’ rodólu Titi Muñoz nel mio pueblu y Antonio Llaneza robló ‘Valiente’, qu’algamó el premiu nel FIVO internacional d’Uviéu y supunxo un trabayu burócraticu escomanáu de permisos (delegación gobiernu, intendencia d’armes, patrimoniu, ayuntamientu, etc) pa meter armes y recreadores nel mesmes trincheres onde asocedió la batalla d’El Mazucu.
Nosotros sabíemos que Rabil yera trabayu rompedor y había que promocionalu enforma y preestrenalu. Llevémoslu pal Campoamor nel Dia de les Lletres, fecha perimportante pal asturianismu, a la Llaboral de Xixón y hasta conseguí retresmitir un conciertu na TPA. Ye verdá que na escena asturiana yo nun necesito dami a conocer, pero sí facía falta que la xente viera’l nuevu formatu. “Coime, Héctor trai otru rollu nuevu amás de cantar asturianaes y pregonar mercaos astures”. Refiérome a eso.
Sicasí, al ser una autoedición yo mesmu tuvi que meter bien d’hores en xeres de visibilidá y promoción, qu’anguaño son tan importantes como la música, como bien dices. Trackings, mailing, canvas… Alredor d’esto préstami cuando Cristian de Legalzone, que lleva la mio oficina de contratación, diz que si dalgún día me falten conciertos contrátame d’alministrativu (rises). La verdá que pa min fue un retu y préstami que s’aprecie’l trabayu nesa estaya. Sicasí, tenemos más falta d’un management que d’otra cosa. L’equipu de trabayu seguimos componiendo nuevos temes nesta llínia y Rabil agora mesmo escúchase más fuera que dientro d’Asturies. Prestaríanos movenos más.
«Tenemos más falta d’un management que d’otra cosa. L’equipu de trabayu seguimos componiendo nuevos temes nesta llínia y Rabil agora mesmo escúchase más fuera que dientro d’Asturies»
Amás de multiintrumentista, yes Doctor en Musicoloxía y docente. Esto nótase tamién en Rabil, que tien un componente divulgador nel so llibretu.
A ver, a mín préstami dicir que soi más fíu de lo que faigo que de los títulos que traigo (rises), pero ye verdá que nel llibretu de 20 páxines meto bien d’información granible alredor de la gaita rabil. Per exemplu’l datu inéditu y la semeya d’un rabileru talláu nun capitel del s. XIV na catedral, o los versos sobre la gaita rabil de Teodoro Cuesta nel 1880 y que tan escritos n’asturianu… La divulgación ye una parte importante de mín porque, por desgracia, l’asturianu mediu ye especialista en desconocer la so propia cultura.
«La divulgación ye una parte importante de mín porque, por desgracia, l’asturianu mediu ye especialista en desconocer la so propia cultura»
Tienes collaborao col gobiernu asturianu n’aspectos como’l testu que s’usó pa declarar BIC a l’asturianada. Tamos nel ecuador d’una llexislatura onde “lo asturiano” tuvo bastante presente nel alderique públicu y en dalgunes de les polítiques desendolcaes. ¿Cómo valores los pasos daos nesta materia y qué deberes pondríes al gobiernu y a la Xunta Xeneral pa estos dos años que queden hasta 2027?
Naquel momentu fici esi trabayu pal BIC porque na Universidá dixeron-y a la Direición de Patrimoniu que yera la persona más indicada. Como académicu que tamién soi, préstami que davezu llamen dende’l Principáu y me pidan conseyu pa temes estremaos. Hónralos querer facer les coses con precuru. Tengo fecho dende contribuciones a currículos educativos hasta remocicar bases de concursos vocales tan importantes como l’autonómicu «La Busdonga». Fáigolo con gustu y lo meyor que sé.
Agora bien, sobre los pasos daos alredor de l’asturianu na escena política, yo nun fui invitáu a falar na Xunta Xeneral estos díes atrás, pero ellí tuvo’l director del Instituto Cervantes Luis García Montero razonando que la llingua asturiana taría siempre amenorgada si l’Estatutu d’Autonomía nun recueye la so oficialidá. Yo pienso igual. Ye una cuestión de derechos del ciudadanu. Ta claro que si l’asturianu y l’eonaviego nun son cooficiales n’Asturies ye porque hai una histórica incapacidá d’apreciar la propia cultura espeyada nos representantes políticos. Hai asturianos que viven nun oxímoron vital, y esplícome: nun pues defender la sidre y prohibir plantar pumares. Nun pues dir de súper asturianu repartiendo carnés d’asturianía y censurar a los que falamos, vivimos y creamos nesa llingua, que también ye la d’ellos magar que quieran dexala morrer n’abertal.
Mientres que’l movimientu asturianista somos interclasista y tresversal y enllenamos la cai dende va 40 años, nos caberos pasos políticos nesta materia hai más xestos bonos que va una década, pero sigue ensin haber fechos.
Y como dixo Frank Zappa, cuando una comunidá nun fai bastante pa desendolcar la so cultura, nun invierte ni anima o dinamiza, o directamente nin siquier ta arguyosa d’ella, entós esa comunidá igual nun merez existir. La cultura y les coses guapes que produz una sociedá van sobrevivir miles d’años, y non les coses qu’impongan cultures foriates o los productos d’empreses que s’asitien equí nun momentu concretu. Escontra los que aplauden coles oreyes el AVE, los ocalitos, les mines d’oru, Amazon, Indra o los pisos turísticos ensin llende, los asturianos que nun emigramos somos lo que diz el canciu de Dixebra, “indios de la mesma tierra”. Cumplimos el deber de tresmitir la nuestra cultura y desiximos los nuestros derechos ciudadanos pa siguir faciéndolo.
«Escontra los que aplauden coles oreyes el AVE, los ocalitos, les mines d’oru, Amazon, Indra o los pisos turísticos ensin llende, los asturianos que nun emigramos somos lo que diz el canciu de Dixebra, “indios de la mesma tierra”. Cumplimos el deber de tresmitir la nuestra cultura y desiximos los nuestros derechos ciudadanos pa siguir faciéndolo»
Pa rematar. Yes un veteranu de la música tradicional asturiana qu’entamó nesto dende mozu y tamién yes director de la Banda de Gaitas Picos de Europa – DOP Cabrales. ¿Cómo ves la situación d’anguaño de la música de raigañu n’Asturies, la so incidencia ente les xeneraciones más nueves y el futuru d’esti son?
La incidencia social ye menor qu’en dómines anteriores y la implantación educativa de la cultura asturiana ta por desendolcase amañosamente a tolos niveles alluendi les asociaciones culturales. Nes aules hai un fracasu claru na tresmisión de los valores, la historia y la idiosincrasia asturiana a les nueves xeneraciones d’asturianos. Nun ye de recibu escoyer relixón o asturianu, francés o cultura…
Les xeneraciones actuales organícense cuasique’n tribus urbanes (los folkis, los de les nueches en danza, los de l’asturianada….)
Nel gran públicu hai alienación y desarraigu cuando al tocar la gaita rabil la xente entruga ¿cómo se llama esi aparatu?
Alredor de la escena musical, que tanto facemos por caltener estayes como la llingüística, yo nun midiría la so salú en base a grupos o iniciatives que salgan añalmente. Hai que ver cuánta xente trabaya y cotiza n’Hacienda como profesional, o al traviés d’una empresa como faigo yo. Esa ye la preba de l’algodón, al mio paecer.
Pal futuru d’esti son fai falta que la TV pública asturiana, que pagamos toos y toes, ponga conteníos fixos non arrequexaos n’horarios nocherniegos. Los asturianos, dígolo con pena, llevamos sieglos siendo menos de lo que fuimos. Y too por culpa nuestra. Lo d’anguaño ye un harakiri cultural en toa riegla.
Nesta cuestión quiero dicir que los Paraísos Naturales dan pa que guíes como’l Tripadvisor o Les Fartures empobinen a los turistes, qu’enllenarán el nuevu AVE más que nós, a esfrutar les vacaciones ensin decatase del aislamientu y la mala lleche del equipu llocal. Non hai corresponsales de prensa nacional n’Asturies y ensin dir más lloñe, anguaño El País robla la so información asturiana dende Valladolid. Asina que si la xente común, por edá o por inorancia, caltién una idea turística nada rial d’esti pequeñu mundu irremisiblemente acabáu ¿quién s’alcuerda güei de les sos tradiciones? ¿quién llucha por siguir utilizando esa llingua propia d’Asturies, la música, la cultura y’l so idioma? Mui pocos. Necesitamos tolos recursos, incluyendo la TV.
Necesitamos facer andecha, «nun creyer histories que son verdaes a medies, porque crécennos les oreyes», como diz el canciu de Nuberu. Los asturianos xuntos podemos planta-y cara a cualisquier imperiu, como va dos mil años en Lancia (otra vuelta los celtes, ¿visti?).
La situación agora ye que na música asturiana, mesmo que dicía’l poema de Gabriel Celaya, hai que tomar partíu. Partíu hasta manchase. y tampoco nun se pue depender de subvenciones pa puxar pela cultura. Hai que cuidase de los “intereses mercenarios” qu’anubren l’arte, como dicía Kropotkin. Yo tengo muncha ilusión puesta nesti discu Rabil. Un trabayu autoeditáu de primer nivel qu’entama un nuevu facer musical na mio carrera. Naguo ufrir conciertos bastantes como p’axitar conciencies y facer disfrutar a la xente colo que faigo. La música y l’esfuerzu fechu bien lo merecen y siento que toi nun momentu clave na mio carrera. Aportar a ocho discos asoleyaos ye toa una conquista, pero siento qu’entá tengo muncho que decir alredor de la cultura musical d’Asturies.
