Muerre la osa «Paca» siete años dempués de la so hermana «Tola»: hubo que sacrificala para «evita-y mayor sufrimientu». L’exemplar, de 36 años (l’equivalente a 100 nun humanu) símbolu del caltenimientu n’Asturies, presentaba un deterioru irreversible nel so estáu físicu». Debía-y’l so nome a Francisca, la muyer que-y dió’l biberón a una osezna güérfana que acabaría convirtiéndose nun símbolu ésta tierra asturiana.
- Fonte: LNE / Actualidad Asturies /
Sicasí, nun ye momentu de baxar la guardia: l’osu pardu cantábricu sigue incluyíu na Llista Colorada d’Especie en Peligru d’Extinción y, a nivel internacional, ta catalogáu como en peligru d’estinción pola Unión Internacional para’l Caltenimientu de la Naturaleza (UICN).
La osa «Paca», iconu del caltenimientu n’Asturies al pie de la so hermana «Tola», morrió esti xueves, en siendo sacrificada pola Fundación Oso Asturies, responsable del so cuidu, «para evita-y un mayor sufrimientu», según los veterinarios. . L’exemplar tenía 36 años (l’equivalente a unos 100 nun humanu) y sufría problemes de movilidá, que se fueron apinando nos últimos díes.
El Gobiernu del Principáu, al traviés de la Conseyería de Mediu Rural y Política Agraria, autorizó la eutanasia del animal n’evaluando l’últimu informe veterinariu, que revelaba «un importante deterioru irreversible del so estáu físicu». La osa, tal como indica dichu informe, “presentaba una dificultá motora creciente, con diagnósticu presuntivo d’artrosis”, problema que foi a más la seronda pasada. Trátase d’una patoloxía frecuente na especie a partir de cierta edá, según esplica la Fundación Oso Asturies.
«Paca» vivía na corralada de Santo Adriano, al pie de la osa Molinera», y la so muerte llega siete años dempués del de la so hermana «Tola», que finó en xineru de 2018 a los 29 años. «Hai que tener en cuenta que Paca algamó los 36 años ente que los osos pardu en llibertá apenes suelen superar los 20 años de vida. Para desaniciar les molesties que-y causaben los problemes de salú, ‘Paca’ recibió nos últimos años distintos tratamientos pautaos pol serviciu veterinariu, quien amás fixo un siguimientu médicu permanente a la osa», espliquen los sos cuidadores.
Sicasí, nos últimos díes, diz la Fundación Oso Pardo, la so situación empioró, amosando “aparente incapacidá de movimientu, inapetencia y anorexa”. D’esta forma, l’últimu informe concluyó que “la situación actual nun ye compatible con una calidá de vida aceptable” para la osa.
La osa Paca y la so hermana Tola, que morrió en 2018, fueron rescataes en 1989, en quedando güérfanes dempués de qu’un cazador furtivu matara a la so madre. Dambos exemplares permanecíen dende 1996 sol cuidu de la Fundación Oso Asturies na corralada de Santo Adriano, tres un curtiu periodu en Vic (Cataluña) y n’Hosquillo (Cuenca) y una vegada constatada la imposibilidá de que sobrevivieren en llibertá.
Paca y Tola convertierense nel símbolu de la llucha pola supervivencia del osu pardu cantábricu. La so presencia nes corralaes oseres y la so propia hestoria espertó conciencies y favoreció la puesta en marcha d’un plan para la recuperación de la especie que, sicasí, sigue inda en peligru d’estinción.
El trabayu de la FOA
Mientres más de trés décades, la Fundación Oso d’Asturies compatibilizó los sos llabores d’investigación y sensibilización ambiental col cuidu de les oses nes corralaes de Santo Adriano. Estes instalaciones fueron diseñaes para allugar a animales que precisen un períodu curtiu de rehabilitación y tamién como abelugu para los exemplares d’osu pardu cantábricu que la so reintroducción na redolada natural nun ye posible.
