- Abel Mialma Producióis/ videu / cartelu / LNE /
- Nía, Nosoutras Ideamos Arte/ Financia Principáu d’Asturies.
El proyectu «Nía» da’l saltu nel Eo-Navia: presenta’l so primer audiovisual y conviértese n’asociación cultural y feminista. La película documental cunta la hestoria de seis muyeres de Castropol, Bual y los Ozcos.
«Nía» da un pasu más allá y acaba de convertise n’asociación, la primera de la contorna qu’apuesta pol desenvolvimientu comuñal nel rural y con una perspectiva de xéneru. «Tamos peracabando la edición del audiovisual qu’esplica’l proyectu Nía. Pruyíanos enforma da-y movimientu con esa mesma idea de visibilizar a les muyeres del territoriu y faelo cola mirada puesta nel futuru y fuxendo del romanticismu de que lo d’antes yera meyor. Hai coses que caltener, pero otres non y tenemos de mirar palantre porque equí hai futuru pa les muyeres. Hai que reiventase y lluchar», cunta la consultora de xéneru Lola Cancio. Ella ye una de los trés pates de «Nía» xuntu al productor audiviosual Javier Herrera y el promotor cultural veigueño Abel Pérez. Los trés tán na asociación «Nía», al pie de otres munches persones que se xunieron nestos dos años d’andadura cultural.
La película documental, en gallego-asturianu y subtitulada en castellán, va estrenase’l próximu 29 de payares na casa de cultura de Castropol, el conceyu onde va tener la so see l’asociación «Nía». Na cinta participen trés pareyes de muyeres de distintos puntos del territoriu.
«Les trés muyeres nueves tienen de mancomún que se colaron para formase, tuvieron que volver y decidieron quedase», cunta Lola, que s’ocupó de la dirección del documental, mientres Javier Herrera acúpase de la realización.
- Arxelina nació en Xío (Eilao) y exerció como preguera de cabres, pigureira como les conocía nel so conceyu.
- La so fía Carmen Siñeriz ye filóloga, docente y especialista en gallego-asturianu, ello ye que ye una de les responsables del diccionariu que prepara l’Academia de la Llingua Asturiana para la llingua más occidental d’Asturies.
- Matilde Díaz, pixota, nació en Figueres y trabayó en variaos oficios amestaos al mar, dende pescantina a redera y vendedora de mariscu.
- La so fía Jacinta decidió volver al pueblu y, amás d’una trayectoria activista, dedicase al arte escénico.
- D’últimes ta la veterinaria Amparo Iglesias, natural de Revoqueira (San Martín d’Ozcos) y xestora cultural amestada a la Festa dos Flaires, que parola cola so amiga Dolores Martínez, de Santalla d’Ozcos y bien venceyada profesionalmente a la hostelería.
