Publicado en Pelis

Astrid Lindgren: un nuevu conceutu d’infancia

© Jacob Forsell

Pocos autores nel mundu de los llibros para neños tuvieron l’impactu de Astrid Lindgren. El so célebre personaxe Pippi Calzaslargas cumple 75 años, entusiasmando entá coles sos peculiares aventures a llectores de distintes xeneraciones y cultures. Los sos trenta y cuatro llibros de narrativa y los sos cuarenta y un llibros ilustraos superaron los 165 millones d’exemplares vendíos y dieron orixe a series televisives, películes y un ampliu abanicu de productos n’otros formatos (xuguetes, cantares, videoxuegos). Ensin dulda, Lindgren ye la escritora sueca más lleida dientro y fora de les fronteres d’esti país nórdicu.

Pippi, una neña desgarbada, impulsiva, terriblemente risondera, pelirroxa y peza, con dos prominentes coletes y un estrafalariu paxellu, llogró instalase nel corazón de munchos neños, porque representa xenuinos deseos infantiles, como la llibertá plena para xugar, el desafíu del mundu regláu de los adultos y una visión de la redolada col altor qu’un neñu puede da-y. Pippi Calzaslargas, en suecu Pippi Länsgtrump, foi creada a partir del pidimientu que-y fixo la so pequena fía, quien s’inventó esti nome para garantizase nuevos relatos que la animaren mientres una aburrida convalecencia. Ensin propone-y lo, Lindgren taba abriendo la puerta para la creación d’un personaxe impetuosu ya irreverente, que la so primer hestoria apaeció en 1945. Nesti contestu históricu, el sentimientu antibelicista abonaba la construcción d’un nuevu conceutu d’infancia y de suxetos más proactivos na creación d’un estáu de bienestar social.

De dalguna forma, Pippi representa esa infancia empoderada y jubilosa, que desacredita la insensatez del mundu creáu polos adultos, con riegles absurdes, un desatamañáu valor al dineru y poques opciones para esfrutar de l’amistá, el xuegu, la comida y la redolada natural. A pesar de que güei día podamos apreciar el perfil contestatario y ardigosu d’esti personaxe, para la dómina yeren inadmitibles y esmolecedores munches de les actitúes d’esta neña de ficción que podía semar un xerme subversivu en los llectores.

Nos trés llibros que tienen por protagonistes a Pippi y a los sos amigos Tommy y Annika, dellos episodios consoliden un universu particular para la infancia, con motivos tradicionales de la ficción para neños como’l viaxe, la isla y l’esploración, a los cualos sumense distintes convenciones del humor, l’arquetipu del neñu selvaxe, una lóxica invertida y una relación cercana cola redolada. Pippi tien una fuerza descomanao, de fechu puede llevantar un caballu en fierros; caltien una arca llena de monedes d’oru, que-y dexen mercar coses ensin esmolecese por trabayar, y vive sola n’una casa bien pintoresca, yá que la so madre morrió y el so padre, el capitán Calzaslargas, permanez casi tol tiempu n’una remota isla onde ye rei de los caníbales. Nella encarnen munchos deseos infantiles, como’l fechu de nun tener que cumplir un horariu, nun sufrir esmoliciones para ganase’l sustentu y decidir llibremente sobro la so vestimienta, la so dieta y l’usu del so tiempu llibre.

La infancia amuésase como un territoriu supremamente feliz: resulta difícil abandonalo. Negase a crecer instálase como xuna añoranza nos protagonistes, qu’al pie de Pippi piensen que los adultos “tienen que trabayar en coses aburríes, lleven vistíos risibles, sálen-yos dureces y tienen que pagar recibos”.

A pesar de que Lindgren ye llargamente conocida, pola triloxía de Pippi: Pippi Calzaslargas (1945), Pippi Calzaslargas embárcase (1946) y Pippi Calzaslargas nos mares del sur (1948), l’autora sueca escribió otres obres bien potentes, como Los neños de Bullerbyn (1947), Mio, el mio pequeñu Mio (1954), Los hermanos Corazón de Llión (1973) y Ronja, la fía del bandoleru (1981), que consolidaron la construcción lliteraria d’un tipu de neñu decidíu, independiente y con un sentíu bien claro de la xusticia.

Neños fuertes y autónomos na ficción

La configuración de neños capaces de tomar decisiones, enfrentar adversidaes y atopar dientro de sí mesmos la fuerza para diseñar el so destín foi una constante na obra de Astrid Lindgren. Los adultos munches vegaes tán ausentes, apaecen desdibuxaos o, cenciellamente, sumise a les aspiraciones del protagonista.

El pá de Pippi, un marineru que mora n’una isla remota, eventualmente fai una parada nel pequenu pueblu onde vivi Pippi para cerciorase de que tou cola bien. Mio afaya qu’el so padre ye’l rei del mundu de fantasía, onde foi treslladáu para fuxir de la so murnia realidá, y el padre de Ronja, un lladrón axatao y vulgar, quebrase énte la decisión irrebatible de la so fía cuando abandona’l llar.

Nesi sentíu, la lliteratura de Lindgren regala a los llectores modelos de personaxes que tomen les riendes de les sos vides en situaciones difíciles
, como Mio, quien tien de travesar un territoriu escuru pa enfrentase al malváu Kato, y que son capaces de poner en práctica les sos conocencies, como Ronja, qu’apriende del mundu selvaxe les llecciones necesaries pa sobrevivir. Quiciabes, este sía un valor importante nes sos obres, más allá de la maraviyosa capacidá pa somorguiar al llector nun universu ficcional, porque l’autora crea protagonistes sólidos que non se amilanan y tienen abonda determinación pa llevar la so fazaña hasta’l final.

¿Pue ser la infancia dafechu idílica?

Munchos de los llibros de Astrid Lindgren presenten mundos idílicos, onde los neños solo tienen d’esmolecese por ser neños. De xuru esto tien que ver cola so propia infancia, trescurrida metanes un ambiente rural, nel senu d’una familia llabradora nun pequenu pueblu. Xuna infancia segura y llena de felicidá, na que munchos eventos cotidianos podíen convertise en daqué estraordinariu.

Los neños de Bullerbyn ye xuna obra que rezume esti espíritu prístino de la infancia, probablemente como un tributu a la idea romántica de la edá dorada, pero más de xuru como la constatación de que ye posible blindar esi momentu de la vida por que fluya de manera bonal la esencia de la niñez. Ente otres coses, que se desboque el deséu por esquizar, que surda la imaxinación metanes eventos de la vida diaria, que s’establezan complicidaes ente los miembros de la cla familiar, que se transite con naturalidá ente la dimensión de lo fantástico y de lo real, que nun se midan los riesgos y qu’en cada momentu surdan oportunidaes pa xugar.

Munchos de los personaxes de Lindgren irradien xuna desbordante enerxía, pero sobremanera esfruten a plenitú’l fechu de ser neños, xuna raru privilexu que se tien nes sociedaes contemporanees.

Pippi Calzaslargas: Realidá y fantasía entemecíos

Les obres narratives de Lindgren tienen munchos venceyos coles vivencies de la so infancia, con persones cercanes a los sos ciños o con problemátiques de la niñez que-y resultaba acuciosa encetar. Una traza distintiva de les sos obres ye la convivencia d’elementos realistes con otros de calter fantásticu, como la creación de mundos paralelos, l’apaición de seres estraordinarios o’l desenvolvimientu de mañes escepcionales.

Mio entama un viaxe a un reinu imaxinariu, onde tendrá de cumplir una difícil misión: la de ganar al maldadosu caballeru Kato, quien caltien secuestraos a dellos neños del país. Xuntu col so amigu Pompoo y el caballu Miramis traviesa tierres montascoses pa llegar al castiellu enemigu. Recursos propios de los cuentos de faes, como xuna capa d’invisibilidá, xuna espada portentosa y un xeniu que concede deseos, alimenten l’universu paralelu que-y dexa a un neñu maltratáu (que’l so nome real ye Andy, y non Mio) atopar una meyor esplicación a la so orfandad.

Nes sos innumberables incursiones pol monte, Ronja va ver los cambeos y tresformamientos de los ciclos naturales, pero tamién se va atopar con criatures máxiques, como les crueles arpías o los benignos Rumphobs, que viven en llurigues. Los eventos portentosos permedian nun relatu con fuertes referencies al mundu medieval escandinavu, en mediu del cual Ronja ten d’imponese pa salvar la so amistá col fíu del bandu enemigu.

Xuna precursora del ambientalismo

Xuna esmolición manifiesta nos llibros de Lindgren ye la sensibilidá pol medioambiente. Los personaxes realicen incursiones permanentes a sitios naturales. Inclusive un desdexáu xardín puede convertise nun espaciu grandiosu pa esquizar, el tueru buecu d’un árbol puede sirvir como abelugu y llugar d’esparcimientu, los cursos d’agua pueden volvese mares estensos, páxaros ya insectos pueden adquirir un protagonismu ocasional. Les descripciones revelen xuna conexón casi cósmica cola naturaleza, son suxerentes y treslladen al llector a sitios remotos y apacibles, a escenarios onde puede espandise la imaxinación.

La compasión polos animales ye un motivu recurrente, según la convivencia ente neños y otros seres vivos, dacuando antropomorfizados. La naturaleza estiéndese como un telón de fondu: la nueche coles sos estrelles, el mar inabarcable, lo ríos que flúin, los árboles qu’ufierten abellu, los montes montascosos… Esa mirada fuertemente conectada con una redolada más vasta y les coordenaes d’un mundu ensin industrializar amonten la capacidá pa contemplar la guapura de lo natural y afayar les secretes conexones que caltienen l’equilibriu na naturaleza.

Xuna obra que tesciende

La vixencia de Astrid Lindgren fuelga na so capacidá pa construyir personaxes bien seguros y auténticos, per un sitiu, amás de caltener una perspectiva bien cercana a la d’un neñu llector: un ingrediente que supo alministrar sabiamente na construcción de los protagonistes de los sos llibros. Xuntu colo anterior, les sos hestories fueron el xerme pa desenvolver productos culturales como películes y series de televisión. Güei día, delles xeneraciones d’adultos en distintes partes del planeta recuerden la serie de Pippi, creada en 1969, pola so tonada musical y les sos cuidaes escenografíes.

Astrid Lindgren arreya na producción cinematográfica de los sos relatos, tanto nos guiones como na selección del elencu, de manera que pudieren caltener un espíritu cercanu a la intanxible sustanza de la obra lliteraria. Amás d’esta incansable actividá creativa, parte del so tiempu dedicase a responder les innumberables cartes que-y llegaben de remotos llugares del mundu, delles escrites por adultos, que-y estimaben haber -yos regaláu xuna infancia risondera.

Otros de los sos personaxes (Miguel el traviesu, inspiráu nel so padre, o Karlson del teyáu) marcaron a xeneraciones de llectores en distintos contestos.

Mientres la so carrera lliteraria, Astrid Lindgren ganó premios importantes: el Hans Christian Andersen en 1958, la Gran Medaya d’Oru de l’Academia Sueca en 1971 y el premiu de la UNESCO en 1993, amás de recibir otres distinciones y dellos doctoraos honoris causa.

La so obra resignificó el conceutu d’infancia, modernizó moldes lliterarios tradicionales, insufló allegría a los sos personaxes, a los que dotó d’una gran fuerza interior; dio gran importancia a l’a la naturaleza, que ye más qu’un escenariu nos sos llibros; llogró prindar, con hestories increíbles y bien contaes, l’interés de llectores y faló-yos nun llinguaxe cercanu y llimpio.

Munches otres traces aseguren la vixencia y popularidá de les obres de Astrid Lindgren, pero a toos aquellos que cruciamos la puerta que conduz escontra’l so universu narrativu quédanos, pa siempres, la certidume de que viaxemos polos territorios de la infancia suañada.

Autor:

Maestra de Llingua Asturiana Colexu Carmen Ruiz-Tilve - Uviéu