El Desfile de la Mázcara Ibérica enllena de tradiciones y color les cais d’Uviéu
Participaron alredor de 600 persones y más de trenta grupos.
El Desfile Internacional de la Mázcara Ibérica enllenó esti sábadu de personaxes ancestrales, rituales festivos, música y tradiciones les cais del centru d’Uviéu énte la presencia de cientos de persones.
Alredor de seiscientos participantes y más de trenta grupos procedentes de distintos puntos d’España, Portugal y Andorra participaron nesti pasucáis que convirtió a la capital del Principáu nun escaparate del patrimoniu cultural venceyáu a les mazcaraes.
Centenares de persones esfrutaron de representaciones populares, personaxes ancestrales y rituales remotos rellacionaos col usu de les mázcares al ritmu de llueques y tambores a lo llargo de delles cais del centru d’Uviéu, dende la Plaza’l Conceyu hasta El Campo San Francisco.
