El Calatrava d’Uviéu, na gran pantalla: salen a la lluz les primeres imaxes de la película «Los Cuatro Fantásticos», rodada en parte n’Asturies. Pedro Pascal, Ebon Moss-Bachrach, Joseph Quinn y Vanessa Kirby presenten el tráiler de la película grabada en parte n’Uviéu.
- Fonte: LNE / videu / Los cuatro Fantásticos /
La puerta d’un ascensor ábrese. Los actores Pedro Pascal (Míster Fantásticu) y Vanessa Kirby (la Muyer Invisible) apaecen n’escena: «Bienveníos al edificiu Baxter». Asina empieza’l tráiler de la película «Los Cuatro Fantásticos: Primeros pasos», rodada parcialmente nel uvieín Palaciu de Congresos y Esposiciones a mediaos del pasáu mes de payares.
Una esperiencia que dexó encantáu al equipu. Nes escenes, el hall del edificiu diseñáu por Santiago Calatrava apaez totalmente anováu. El llugar convirtióse nun gran salón con elevador con grandes sofás de color azul y coxinos marrones. Nel centru apaez una gran chimenea que cuelga del techu y, al fondu, la cristalera, la característica terraza –tamién con distintu moblame– y la barandiella.
Les vistes son impresionantes y pocu tienen que ver coles d’Uviéu. Los edificios de viviendes de la cai Arturo Álvarez Buylla fueron sustituyíos por rascacielos xigantes de Manhattan. Dempués, apaez Ebon Moss-Bachrach (La Cosa) y el robot H.Y.R.B.I.Y., mientres cocinen unu mueyu. Yá a metá del tráiler vese a Pascal col traxe col que fixo la visita sorpresa a los alumnos del colexu Buenavista II y, a la fin, apaecen los cuatro actores xuntos reparando l’Uviéu convertíu en Manhattan.
Les imaxes del tráiler son solo un aperitivu de la película que se va estrenar mundialmente el 25 de xunetu, y la so fecha de visionau nun ye frutu de la casualidá.
