MARTES 7 DE XUNU DEL 2022
Bonos díes, bona xente.
Alborecemos ente nubes ya claros con unes temperatures que tan alrodiu de los 15ºC, rexistrándose nel puirtu Payares 9,1ºC.
Güei vamos tener intervalos nubosos entemecios ente dellos claros, siendo más abondoses les nubes al atapecer con unes temperatures n’ascensu y col aire de componente norte sele nel llanu y del suroeste moderáu que va dir coyendo puxu nes montañes.
Mañana miércoles vamos tener nubosidá abondosa con precipitaciones febles en forma d’orpín con un descensu de les temperatures másimes y col aire del norte-noroeste sele nel llanu y moderáu en zones de montaña ya puntos del llitoral.
El xueves escamplará y subirán de nuevu les temperatures, siendo’l meyor día de la selmana, paez que’l vienres podemos tener xarabatos de calter tormentosu durante la tarde, tando más seliquino pela mañana col cielu escampláu y temperatures n’ascensu. Situación que va traslladase al sábadu, tando pior el domingu con nubosidá abondosa y precipitaciones moderaes pero esto yá lu diremos viendo.
Que paséis un bon martes collacies ya collacios, sobre too pa los carabayones que güei puen xintar el bollu col permisu del tiempu, más bien debaxu una panera o a la solombra d’un árbol y nun pol agua, si non pa abellugase del sol.
