Estáu del tiempu: vienres 30 d’avientu de 2022

Alborecemos ente nubes y claros o albancios ya con unes temperatures que yá marquen los 20ºC en dellos puntos de la costa y los 15-16ºC nel interior, rexistrándose nel puirtu Payares 7,8ºC. A destacar les fuertes raches de vientu na costa ocidental onde superen los 100km/h como nel Cabu Bosto.

Güei vamos tener el cielu empuercáu por nubes medies y altes con vientu ábrigu que va soplar mui fuerte en zones altes ya en puntos del llitoral con unes temperatures en bultable ascensu por mor del vientu ábrigu qu’al so pasu pela cordelera va provocar l’efeutu foehn, faciendo que subán les temperatures pelos valles hasta la costa.

N’alborada de mañana sábadu muncho precuru col vientu que va soplar entovía más fuerte, prolongándose durante tol día , anque amenorgando dalgo al final. Este día nun ye aconseyable transitar pelos parques y menos llevar a les neñes ya neños a les actividaes pa ellos que suelen dase n’estes feches en casi toos los parques de les ciudaes por mor del riesgu de la caida de cañes y árboles. Nel cielu tendremos nubosidá media-alta y les temperatures volverán ser inusualmente altes.

El domingu un frente mui activu va apurrinos precipitaciones de calter moderáu y persistente, yá dende pela mañana con un descensu de les temperatures que sedrá más acusáu al finar el día. La nieve pue cayer nes cumes más altes de los Picos d’Europa, baxando la cota dalgo pela tarde y quedando sobre los 1500m pero sin malpenes precipitaciones y durante’l riscar del llunes. L’aire amenorgará pero seguirá siendo molestu en zones altes ya en puntos del llitoral de direución variable.

El llunes remitirán percompletu les precipitaciones y van abrise grandes claros con unes temperatures mínimes en moderáu descensu, sobre too yá de cara a l’alborada del martes onde puen dase delles xelaes.

Paez que la selmana viniente sedrá seliquina, empeorando’l tiempu la fin de selmana pero esto yá lu diremos viendo.