Seis aerollínees van operar 28 rutes regulares a 13 aeropuertos nacionales y nueve internacionales a partir de güei
El programa de promoción d’Asturies al traviés de la so conectividad aérea va dexar que la comunidá cunte na temporada d’iviernu, que s’empecipia mañana, cola ufierta de destinos directos más amplia de la so hestoria. Dende’l 29 d’ochobre al 30 de marzu, seis aerollínees van operar 28 rutes regulares directes a 22 destinos, 13 nacionales y nueve internacionales, dende la terminal asturiana.
La cartelera de destinos directos suma, respectu al añu pasáu, los enllaces internacionales de Volotea con Lisboa y Milán-Bérgamo, que van operar trés vegaes a la selmana, según les conexones de l’aerollínea de baxu costu con Granada y Barcelona y la ruta con Fuerteventura mientres el periodu navidiegu.
D’esta miente, consolídase tamién pel hibiernu, la mayor ufierta de vuelos internacionales na hestoria del aeropuertu asturianu, con nueve destinos a siete países, lo que va reforzar l’apueste pola conectividad internacional realizada’l pasáu branu y que facilitó l’impulsu del turismu internacional na nuesa rexón. Nesti sentíu, la ufierta qu’entra en marcha mañana va dexar avanzar na desestacionalización al empar que se va ameyorar la *conectividad global de la rexón.
