Les nominaciones son bien variaes. Hai palabres xenériques rellacionaes col mundu infantil (La reciella, Los pequeníos), personaxes de la mitoloxía asturiana (les xanines, Los nuberinos, El diañu burllón), xuegos infantiles (L´escondelerite), flora y fauna (El Castañéu, O esguín, La parpayuela), alusiones a la toponimia (La Veiga, La Brañona) o xentilicios de la zona (Los polesinos, Los carbayoninos).
Per otru llau, l’asignación de nomes oficiales a estos centros educativos resulta tamién imprescindible para’l procedimientu de creación alministrativa d’Escuelines, que’l so espediente yá ta en tramitación.
La conseyería ta peracabando un informe que contien una ficha de cada escuelina cola denominación xenérico y específico, el códigu de centru, la dirección, el llugar y el conceyu, amás del númberu d’aules previstes y la capacidá máxima d’alumnáu.
Ese informe va unviase llueu al Conseyu de Gobiernu, que tendrá d’autorizar tantu la creación de les Escuelines como los sos nomes oficiales.
Quepe recordar que’l Principáu va construyir directamente 15 escuelines n’espacios disponibles en colexos públicos, ente que les otres 16 son tán edificaes los conceyos cola última subvención de fondos europeos del Mecanismu de Recuperación y Resiliencia (MRR) y que va asumir tamién el Gobiernu d’Asturies. Esta primer fase consta d’un total de 54 unidaes y un máximu de 832 places.
