«Trece Reyes ye una obra que tresmite la construcción de la identidá d’Asturies al traviés de la música».
https://musicasturiana.com/wp-content/uploads/2024/05/inaki-santianes-direccion-trece-reyes.jpg
Trece reyes ye’l nome d’un ambiciosu proyectu entamáu pola Banda de Gaitas La Laguna del Torollu y la Banda Sinfónica del Ateneo Musical de Mieres. La obra foi estrenada’l 21 d’abril en Mieres y va volver a sentise esti sábadu 1 de xunu en Nava. Ye una xénesis de narración y música programática na que’l sinfonismu y lo popular revístense de tintes épicos pa cuntanos la hestoria de la monarquía asturiana. Noticia LNE
Pa falanos d’ello, cuntamos col testimoniu del director del proyectu, Iñaki Sánchez Santianes. Iñaki ye tituláu en Gráu Superior de Fagot y Profesional de Gaita, diplomáu en Maxisteriu pola especialidá d’Educación Musical y mayestru de Gaita y de Música na Educación Primaria. Con él, trabayó codu con codu’l so hermanu Yónatan Sánchez Santianes en calidá de compositor. Ye tituláu en Composición pol Conservatoriu Superior de Música de Salamanca y doctor cum laude pola Universidá de Las Palmas de Gran Canaria. Con más de trenta trabayos de la so autoría y doscientos como orquestaor al costazu, Yónatan compaxina’l so labor de compositor residente de la Orquesta Sinfónica del Atlántico cola Cátedra de Composición nel Conservatoriu Superior de Música de Aragón.
Iñaki, sitúanos nel entamu d’esti proyectu. ¿Cómo surde la idea de facer Trece reyes?
Dende va tiempu, dalgunos gaiteros de la Banda de Gaites La Llaguna del Torollu collaboráremos en delles actuaciones de la Banda Sinfónica del Ateneo Musical de Mieres col mayestru Antonio Cánovas al frente y siempre plantegáramos la posibilidá de facer daqué más grande xuntos. La idea surde nel mes de payares del pasáu añu cuando nos sentamos a trabayar nesta propuesta y presenté-yla a mio hermanu pa ver qué podíamos facer xuntos. La temática ye cosa d’él y dende entós punxímonos manes a la obra pa sacar esta propuesta alantre cola mayor de les ilusiones en dambes agrupaciones.
«Ye una forma d’averase a la hestoria al traviés de la música y sobremanera de conocer dalgunos de los personaxes más desconocíos de la mesma»
Entós esta obra, ¿ye una invitación p’averase a una parte de la hestoria d’Asturies?, ¿qué tien de singular?
Totalmente. Ye una forma d’averase a la hestoria al traviés de la música y sobremanera de conocer dalgunos de los personaxes más desconocíos de la mesma. La singularidá ta na conxunción d’una banda gaites completa con una banda música, un repertoriu prácticamente nuevu na so totalidá y la preba de nueves sonoridaes que representen a la nuesa rexón.
Viendo y sintiendo l’espectáculu, nun queda dulda dalguna qu’hubo un intensu exerciciu de síntesis hestórica, llabor compositiva y preparación de los músicos pa que too saliera a la perfección ¿Cómo se desendolcó tou esi llabor inxente?
Tou esi llabor recayó nel mio hermanu Yónatan. Él ye la mente pensante y yo el brazu executor. A lo llargo d’estos meses fuimos desendolcando toes eses idees y él diba plantegándome propuestes, melodíes, fragmentos, instrumentos que podíamos averar o quitar, etc. Poder tener al compositor tan a mano ayudó a que la obra fuera construyéndose a la midida de dambes agrupaciones y tamién a que toos sintiéramos el proyectu como daqué propio y non namás como una partitura que llega a les nueses manos y hai que tocala ensin más.
«Poder tener al compositor tan a mano ayudó a que la obra fuera construyéndose a la midida de dambes agrupaciones y tamién a que toos sintiéramos el proyectu como daqué propio y non namás como una partitura que llega a les nueses manos y hai que tocala ensin más»
Fálanos de la esperiencia del to hermanu Yónatan nel campu la composición.
Ye difícil falar como hermanu de forma oxetiva pero creo que ye ún de los grandes desconocíos d’esta rexón. Lleva años trabayando en conservatorios como profesor de composición pero tamién desenvolvió numberosos proyectos compositivos que cualesquier qu’entre na rede puede alcontrar. Equí n’Asturies yá collaboró cola Fundación Magistralia fai yá dalgún tiempu con una obra titulada La voz de los mansos na que la gaita yá tenía un protagonismu dientro de la orquesta. Tamién ye l’autor de les obres que componen el discu que grabamos cola Orquesta Sinfónica del Conservatorio Profesional de Música d’Uviéu tituláu A los sos güeyos. Fora de la nuesa rexón recibió dellos premios de composición y realizó obres corales, pa grupos de cámara, arreglos pa otru tipu d’agrupaciones tanto de música clásica como d’otros estilos. Creo qu’al traviés de Trece reyes la xente va afayar a un compositor asturianu que fai carrera fora de la nuesa rexón.
Nel itinerariu de monarques recamplen dalgunos nomes como’l de Ramiru I, que nel so reináu se vivió un notoriu crecimientu cultural y artísticu. Tamién rescampla unu femenín, Mencía, pa la que brindáis un claru alegatu nel so favor. ¿De qué forma vos inspiraron estes dos figures?
Na obra Yonatan considera que Ramiru ye’l filu conductor de la obra y apaez representáu nel restu los fragmentos de la serie. Son dellos los guiños melódicos o armónicos que se van enxareyando a lo llargo de la obra y que fai qu’esta tenga un soníu uniforme.
Tocantes a Mencía, ye’l nome de mio fía; ye una pieza que yo compunxi va un tiempu y que’l mio hermanu rescató pa esti conciertu y realizó tola orquestación pa incluyila dientro del mesmu. Nun ye namás un guiñu y un homenaxe a mio fía, sinón tamién una alcordanza y una reivindicación a les muyeres qu’a lo llargo de la hestoria tuvieron callaes y de les qu’adulces cada vez vamos sabiendo daqué más y tenemos que reclamar la so importancia y la so relevancia hestórica.
«La figura de Mencía ye una alcordanza y una reivindicación a les muyeres qu’a lo llargo de la hestoria tuvieron callaes y de les qu’adulces cada vez vamos sabiendo daqué más y tenemos que reclamar la so importancia y la so relevancia hestórica»
Ye perinteresante comprobar como a lo llargo de la composición atopámonos dende guiños a la música popular astur-galaica, dalgunes melodíes en tonu árabe, bandes sonores de películes, incluso paeciónos sentir el popular cantar de Doce cascabeles. ¿Qué puedes decinos sobre’l sentíu programáticu de la música?
Como dicía enantes, la obra tien un filu conductor al traviés de distintes melodíes o xuegos harmónicos que van presentándose a lo llargo de la obra de distintes maneres. Esta preséntanos al traviés de la música distintos momentos claves nel reináu de caún d’estos monarques asturianos. Los testos qu’acompañen a la obra van preparándonos pa lo que dempués vamos sentir. Asina, como bien fales, sentimos un fragmentu con tintes árabes que nos averen a la batalla de Cuadonga o una marcha fúnebre que nos suxiere la resultancia de la engarradiella ente Favila y l’osu. Pero tamién si sentimos la obra con procuru podemos dir albidrando la construcción del Himnu d’Asturies a lo llargo de caún de los movimientos. Podría dicise que la obra tresmite la construcción de la identidá d’Asturies al traviés de la música.
N’Asturies, la gaita y el sinfonismu, aún con dalgunos antecedentes, ye una estaya poco frecuentada polos músicos y compositores. Con too, el públicu recibe estes obres con gran entusiasmu, como ye’l casu de Trece reyes. ¿Ye un terrenu pol que se debería apostar más?
Yá dende los años nos que trabayé como profesor de Gaita nel Conservatorio Profesional de Música d’Uviéu anduve na cata de nueves sonoridaes pal instrumentu y sobremanera pola inclusión del mesmu n’agrupaciones consideraes clásiques, polo que’l instrumentu puede apurrir. Non solo a nivel sinfónicu o bandísticu, si non tamién no tocante a la composición de nueves obres o adaptación d’otres que puedan apurri-y al instrumentu y tamién qu’averen la gaita a otros públicos foriatos n’orixe. Si daqué vimos nesti poco tiempu que tien Trece reyes, ye l’interés qu’espertó nun públicu poco avezáu al soníu de la gaita y que s’avera a la obra con interés para ver cómo resulta esti amiestu y marcha sorprendíu.
«Si daqué vimos nesti poco tiempu que tien Trece reyes, ye l’interés qu’espertó nun públicu poco avezáu al soníu de la gaita y que s’avera a la obra con interés para ver cómo resulta esti amiestu y marcha sorprendíu»
Esta esperiencia, ¿qué posu vos dexa y qué inquietúes vos despertó?
Pos la verdá que tolo que podemos dicir son coses positives. El papel de la Banda Sinfónica del Ateneo Musical de Mieres ye clave y tanto los sos músicos como toles persones que la arrodien fixeron que síamos yá una familia y que tuviéramos bien cómodos pa poder sacar esto alantre. Sabíamos toos que yera un retu importante yá que tamos falando de dos agrupaciones amateurs y bien nueves pero eso tamién apurrió munches coses a la obra. A caldía que nos xuntamos xenérase una maxa y surden nueves idees y propuestes, pero creo que tenemos que dir adulces construyendo Trece reyes.
Dempués de Mieres, Uviéu y Nava, ¿qué va ser lo siguiente?, ¿volveremos sentir pronto esta obra en direutu?
Pel momentu lo siguiente que tenemos previsto ye llevar esti proyectu al Festival Intercélticu de Lorient. Ye una propuesta distinta y novedosa y nun hai meyor escaparate que’l festival de música más importante. Dempués vamos prebar nuevos escenarios pa que pueda sentise en directo n’Asturies. Sobre manera, tamos trabayando pa poder llevalo a un auditoriu o sala de conciertos zarrada na seronda onde’l públicu pueda sentir los matices de la obra y esfrutala na so totalidá.
https://www.martesdecampo.es/wp-content/uploads/2022/10/asturiesb.jpeg
