El próximu 6 de xunetu l’Ayuntamientu Bimenes entama la XXVIII Fiesta de la Oficialidá de la Llingua Asturiana y, nesta ocasión, la persona escoyida pa echar el pregón de la mesma va ser Enrique Carballeira Melendi, más conocíu como Kike Carballeira. SEMEYA KIKE CARBALLEIRA (©): Onda Cero Asturias.
Nacíu en L’Infiestu (Piloña) en 1970, yá dende bien mozu amosó la so creatividá y, con ello, el so compromisu pa cola normalización social de la llingua asturiana. Kike ye, fundamentalmente, dibuxante y historietista, y nesta estaya yá publicó’l llibru “El cuélebre y l’home del espaciu” en 1991, primeru d’una llarga riestra de más de cincuenta obres asoleyaes, bien como autor, tanto de testos como de dibuxos, bien como ilustrador.
Gracies a dalgunes d’elles tien ganao un bon carráu de premios, ente ellos el “Montesín” de lliteratura infantil y xuvenil de la Editorial Trabe y la Conseyería Cultura o, en delles ocasiones, el de “Llectures pa rapazos” convocáu pola Academia de la Llingua Asturiana. Arriendes d’ello, entamó la editorial Asturtoons, cola que tien publicaos munchos d’esos trabayos, y ye’l creador de personaxes tan conocíos como “Lotu”, l’asturcón col que dende hai unos años se promociona turísticamente’l Conceyu Piloña.
Profesionalmente trabaya nel sector del periodismu, onde lleva más de venti años siendo la voz de la emisora Onda Cero en L’Infiestu, dende la que da bona cuenta de tola actualidá del oriente d’Asturies pero tamién de tolo que se fae nel nuestru conceyu, Bimenes. Tien collaborao tamién bien de tiempu col diariu El Comercio, como corresponsal, ún de los redautores de “Alitar Asturies” (la estaya del periódicu empobinada a la llingua asturiana) y autor de la tira cómica “Los Urriellu”. Precisamente coles sos viñetes participa tamién n’otros medios de comunicación, como na mesma Onda Cero –apocayá presentó, precisamente en Bimenes, el llibru “El Dial Ilustrado”, que recueye les tires cómiques asoleyaes na edición dixital d’Onda Cero Asturies–; en La Crónica de Piloña (“Sidronucu”, “Mon”, “Piloña Máxica”…) y, dende’l so aniciu, nel selmanariu El Fielato & El Nora, onde la tira “Les coses de Nardo y Quina” abelluga a los que quiciabes son los sos personaxes más conocíos.
Por último, dende l’Ayuntamientu Bimenes queremos destacar de Kike Carballeira la so collaboración desinteresada en too aquello que se-y pide, como nel diseñu del personaxe mitolóxicu que foi imaxe en cartelos y camisetes del venti aniversariu d’esta fiesta, en 2016.
