- Noticia /
- La inclusión nel programa formativu del Institutu Cervantes respuende al pidimientu del Gobiernu d’Asturies pa la internacionalización y promoción de la llingua asturiana
- Les clases empiecen presencialmente’l 25 d’ochobre na sede de Manhattan y van ser impartíes pola profesora y escritora Paquita Suárez Coalla
La llingua asturiana forma parte per primer vez de la programación del Institutu Cervantes de Nueva York. Col títulu Introduction to Asturian Language and Culture, la institución pública española presente en 45 países va llevar la enseñanza de la llingua asturiana hasta’l corazón de La Gran Mazana al traviés de los sos cursos de seronda.
La presencia de la formación d’asturianu en Nueva York ye frutu de la collaboración ente la Conseyería de Cultura, Política Llingüística y Deporte del Principáu d’Asturies y l’Institutu Cervantes. Nesti sentíu, los pidimientos del Gobiernu d’Asturies fueron atendíos pol organismu públicu y, como resultáu, les clases de la llingua asturiana nos centros internacionales van ser una realidá, nesti casu, nel distritu de Manhattan.
L’equipu docente del Cervantes neoyorquín preparó un programa formativu distribuyíu en seis sesiones lectives presenciales que se van impartir los vienres que van dende’l 25 d’ochobre hasta’l 6 d’avientu. D’esta forma, el cursu va permitir al alumnáu familiarizase col asturianu, averase a la so historia y conocer delles de les particularidaes de la cultura asturiana. Al traviés de la lliteratura, la música y una variedá de documentos audiovisuales, los participantes van conocer los principios básicos de la estructura sintáctica, léxica y fonética de la llingua propia del Principáu. Amás, a la fin del cursu, van ser a lleer testos curtios nesta llingua y participar en conversaciones básiques n’asturianu.
La escritora, traductora, crítica lliteraria y profesora Paquita Suárez Coalla va ser la encargada de dirixir la docencia del asturianu en Nueva York. L’autora de llibros en castellán y asturianu lleva años comprometida coles llingües propies d’Asturies y anguaño desempéñase como profesora d’español y lliteratura nel Departamentu de Llingües Modernes del Borough of Manhattan Community College (CUNY).
La inscripción nuna de les 12 places ufiertaes nesti cursu pue formalizase yá al traviés d’esti enllaz https://acortar.link/M3wrK3 o na páxina web del Institutu Cervantes de Nueva York (https://nyork.cervantes.es/)
*Pa ampliar la información, axúntase un documentu pdf cola programación completa del Institutu Cervantes de Nueva York onde apaez el cursu de asturianu.
