- Fonte: Música Asturiana / Cantar «Llobatu» /
- Conseyería Cultura, P. Llingüística y D. Asturies Cultura en Rede.
- Héctor Braga: web / wiki /
Falamos con Héctor Braga del XVI Premiu Camaretá al Meyor Cantar que se celebra esti vienres y nel que ye finalista con «Llobatu».
«Ye prestoso tar nomináu a un premiu
que quier prestixar la llingua de nueso,
y neso tamos tolos que cantamos n’asturianu»
Esti vienres 8 de payares a les 19h tien llugar nel Teatru La Llaboral de Xixón la gala final del XVI Premiu Camaretá al Meyor Cantar, l’únicu premiu institucional qu’esiste anguaño pa da-y reconocimientu a la creación orixinal de música fecha n’asturianu o gallego-asturianu. La Bonturné con “Odisea la nuí“, Susana Gudín con “Contigo“, Ferla Megía con “Medrana a Medrar“ y Héctor Braga con “Llobatu“, son los cuatro grupos y cantares nominaos nesta edición. Dende musicasturiana.com vamos falar esta selmana cada día con ún de los artistes nominaos pa conocer por qué escoyeron esi tema, si tienen preparao daqué especial pa la final y qué supón participar nesti certame.
Siguimos el cuestionariu con Héctor Braga. Según recueye la web oficial del Camaretá «ye un artista y productor multidisciplinar dedicáu a les músiques clásiques y de folk. Con siete discos asoleyaos hasta la fecha, pue dicise que ye ún de los referentes más afianzaos na música del país con abondes reconocencies y premios. Héctor ye una referencia nel estudiu y conocencia de la música asturiana porque tien una trayectoria granible qu’axunta’l trabayu de campu y la investigación con dos carreres superiores (música y etnomusicoloxía), un máster en comunicación, un títulu profesional de gaita y un doctoráu cum laude n’Historia del Arte y Musicoloxía.».
¿Qué supón pa ti la nominación nesti premiu y qué supondría ganalu?
La nominación ye una reconocencia granible y bien guapa. Esti premiu “Camaretá” quier consolidar, arriquecer y prestixar la llingua de nueso, y neso tamos tolos artistes que cantamos n’asturianu. Ye prestoso tar nomináu a un premiu tan visible pa la música’l país y tan simbólicu pol so nome. Inda más pa un rapaz de la cuenca que, como yo, creció lleendo a Manuel Asur y sintiendo cantar a Chus Pedro, parte d’aquel colectivu…
Coincidió que, polos mios propios ciclos creativos -que van al marxe de premios o subvenciones-, dende qu’asoleyé La fonda de Lola (2015) tuvi más venceyáu a la música tradicional, a los cantares n’otres llingües y a los llibros d’investigación. Poro, nunca nun me presentara a esti galardón hasta qu’esti cantar, “Llobatu”, lo fizo posible. Y toi mui contentu de tener llegao a esti momentu. Ye más, pal procesu de componer n’asturianu molestéme hasta en sacar un C1 na llingua de nueso, pa facelo meyor (rises). Ye esencial saber bien lo que quies facer tú y facelo de la manera más impecable y afayadiza posible. Hai que prestixar la llingua de nueso, no musical y no lliterario.
Pa min, ganar diba ser un lloréu enforma prestosu pa un gran añu onde tamién gané’l premiu d’ensayu en llingua asturiana col mio llibru Nel cantu la memoria, sobro l’asturianada tradicional.
¿Por qué escoyisti esti cantar pa concursar?
“Llobatu” ye’l primer cenciellu del mio prósimu trabayu, Rabil, l’octavu discu qu’asoleyo pa esti fin d’añu. Nesti discu tamién andechen conmigo cantando n’asturianu Víctor Manuel o Joaquín Díaz, ente otros. El fechu ye que na primer selmana, “Llobatu” algamó más de 1.000 visualizaciones en youtube y cerca 2.000 escuches nel Spotify. Tien una producción musical y visual que, magar de ser autoeditao como casi tolo que yo faigo, tien un primerísimu nivel, cola andecha instrumental d’Hevia y la producción musical de Javier Blanco (Mägo de Oz, Söber, etc). Yera’l meyor cantar que podía ufrir n’acordies col tiempu de les candidatures a esta edición.
¿Tienes daqué especial preparao pa l’actuación del domingu?
Caro ho, llevo hasta’l mio propiu backline y proyeutamos vídeos mientres la música. Al premiu voi como solista, pero llevo al mio equipu de trabayu qu’axunta casi una docena persones ente músicos y técnicos de toa triba colos que trabayo, n’Asturies y fuera d’ella, tola rueda l’añu. Va tar bien guapo de ver, tanto nel teatru como pela TV.
