- El Tiempu n’Asturies.
- Alborecemos col cielu cubiertu y lloviendo con unes temperatures que tan alrodiu de los 13ºC, rexistrándose nel puirtu Payares 7ºC.
- Güei vamos tener el cielu mui nuboso con precipitaciones durante la mañana febles pero llocalmente persistentes con tendencia a remitir y desaparecer pela tarde. Les temperatures camudarán poco o baxarán dalgo les másimes por mor de la lluvia. El aire gallegu pue soplar con dalguna racha moderada en zones del llitoral y cordelera.
- Mañana llunes alboreceremos ente borrinos y nublines, dixebrándose a lu llargu la mañana pa dexanos nubes ya claros o abancios nes hores centrales del día. L’aire nordés entamará a soplar pudiendo ser cafiante nel llitoral y zones espuestes con unes temperatures qu’anicien un descensu y por mor del vientu la sensación térmica entovía sedrá menor.
- El martes vamos tener nubes ya claros o abancios pero con unes temperatures en nidiu descensu cola llegada d’una masa fría continental dende Europa que poles sos carauterístiques suelen ser secas. Al finar del día aumentará la nubosidá dende’l oriente pa dexanos el cielu nuble. Esti día va seguir soplando cafiante l’aire nordés nel llitoral y zones espuestes.
- LLEGA LA NIEVE. El miércoles sedrá un día ivernal 100% con xarabatos frecuentes de calter ente feble y moderáu, sobre too durante’l riscar y l’alborecer con nevaes na cordelera perriba de los 1300m y temperatures en bultable descensu, amás l’aire nordés soplará con fuercia y baxará entovía más la sensación térmica.
- Los siguientes díes seguirá revueltu y fríu y pa más alantre hai la posibilidá d’un temporal de norte pero esto yá lu diremos viendo.
Semeya d’archivu nel puirtu Vegará.
